कनकाई खबर \ कनकाई नगर क्षेत्रका कोरोना संक्रमितहरुले स्थानीय सरकारबाट कुनै किसिमको राहतको महशुस नपाएको भन्दै गुनासो पोखेका छन् ।
कोरोना भाइरसको दोस्रो लहरसँगै संक्रमितको संख्या दिनप्रतिदिन बढ्दै गएको यो जटिल अवस्थामा स्थानीय सरकारबाट बेवास्ता भएको भन्दै हाल होम आइसोलेशनमा बसेका कोरोना संक्रमित नगरवासीहरुले स्थानीय सरकारप्रति आक्रोस पोखेका हुन् । कोरोना परिक्षणबाट रिपोर्ट पोजेटिभ आएपछि होम आइसोलेशनमा बसेका नगरवासीको स्वास्थ्य अवस्थाका बारेमा स्थानीय सरकार गम्भिर हुनु पर्नेमा जोड दिँदै कोरोना संक्रमित नगरवासीहरुले स्थानीय सरकारको ध्यानाकर्षण गराएका हुन् ।
होम आइसोलेशनमा बसेका एक संक्रमितले भने, “दुई हप्ता बित्न लाग्दा पनि स्थानीय सरकारले औषधोपचार, खाद्यसामाग्रीका विषयमा कुनै पनि परामर्श नगरेपछि आँफूहरु अन्यौलमा परेका कारण आफ्ना व्यथाहरु सामाजिक संजाल मार्फत सार्वजनिक गरेको हो ।” उचित समयमा नपाएको साथ, सहयोग र परामर्शले समय वितेपछि पश्चाताप गर्नु शिवाय अरु केही नहुने भन्दै कनकाई खबरसँगको कुराकानीमा अधिकांश कोरोना संक्रमित नगरवासीले स्थानीय सरकारको ढिलासुस्तीप्रति दुःख व्यक्त गरे ।
यसरी संक्रमित भएका अन्य धेरै नगरवासीहरुको कष्टकर जीवनका बारेमा सामाजिक संजाल लगायत विभिन्न माध्यमबाट सार्वजनिक हुन थालेपछि कनकाई नगरपालिकाका प्रमुख राजेन्द्र पोखरेलले प्राथमिक स्वास्थ्य केन्द्रका एक डाक्टरलाई साथमा लिएर भौतिक रुपमा नै उपस्थित भई संक्रमितको स्वास्थ्य अवस्थाका बारेमा जानकारी लिएका थिए । सामाजिक दुरी कायम गर्दै प्रत्यक्ष भेटघाट साथै फोनबाट समेत संक्रमितको स्वास्थ्य अवस्थाका बारेमा चासो राख्दै नगर प्रमुख पोखरेलले नगरवासीको स्वास्थ्य अवस्थाका बारेमा आँफू सधैं गम्भिर रहेको बताएका छन् । नगरवासीकै हितकालागि आवश्यक सामाग्री सहितको आइसोलेशन कक्ष संचालनको तयारीमा रहेको समेत नगर प्रमुख पोखरेलले जानकारी दिए ।
नगर प्रमुख पोखरेलले कोरोना संक्रमित नगरवासीको स्वास्थ्यका वारेमा थप सहयोग पुगोस् भन्ने उद्येश्यका साथ प्राथमिक स्वास्थ्य केन्द्र सुरुङ्गामा कार्यरत डाक्टर अभिषेक नायकलाई होम आइसोलेशनमा रहेका नगरवासीसँग परामर्श गरी २४ सै घण्टा आवश्यक सहयोग गर्ने गरी जिम्मेवारी प्रदान गरिसकेको बताएका छन् । डाक्टर नायकले आँफूले पाएको जिम्मेवारी ईमान्दारीताका साथ पूरा गर्न आँफू काममा लागिसकेको बताएका छन् ।
दोस्रो लहरको कोरोना संक्रमणका विषयमा नगरपालिकाको स्वास्थ्य शाखाले दिएको जानकारी अनुसार बुधवार बेलुका सम्ममा कनकाई नगर क्षेत्रमा ८३ जना कोरोनाबाट संक्रमित भएका छन् भने १० जना निको भएर सामान्य अवस्थामा आइसकेको बताइएको छ । नगरपालिकाको स्वास्थ्य शाखाका कर्मचारी एवम् कोरोना फोकल पर्सन नारायण अधिकारीले दिएको जानकारी अनुसार कोरोनाको दोस्रो लहरसँगै नगरपालिकाको कार्यालयलाई जानकारी भएसम्म कोरोना संक्रमित भएका मध्ये एक महिला र एक पुरुष गरी दुईजनाको मृत्यु भइसकेको छ । सक्रिय संक्रमितका रुपमा रहेका ७१ जना मध्ये चारजना विभिन्न अस्पतालमा रहेका छन् भने अन्य सबै होम आइसोलेशनमा रहेको अधिकारीले कनकाई खबरलाई जानकारी दिएका छन् ।
कनकाई नगरका संक्रमितहरु मध्ये अधिकांश वडा नं.३ का स्थानीयवासी रहेको बताइएको छ ।
