कनकाई खबर \ कोरोना संक्रमणका कारण मृत्यु भएका झापा शिवसताक्षी–८ का ७० वर्षीय नरप्रसाद उप्रेतीको कनकाई नदीमा अन्त्यष्टी गरिएको छ ।
पूर्व प्रहरी समेत रहेका उप्रेतीको परिवारका साथमा नेपाली सेनाले अन्त्यष्टी गरेको हो । उप्रेतीको पार्थिव शरीरलाई नेपाल प्रहरी साथै भूतपूर्व प्रहरीहरुको एक टोलीले सलामी अर्पण गरेको थियो भने नेपाली कांग्रेस शिवसताक्षी नगर सभापति पर्शुराम ढुङ्गानाले पार्टीको झण्डा ओढाएका थिए । उप्रेतीको मंगलबार दिउँसो कनकाई नदीको पश्चिम किनारमा अन्त्यष्टी गरिएको हो ।
स्वास्थ्यमा समस्या आएपछि काठमाडौँको ह्याम्स अस्पतालमा उपचाररत उप्रेतीलाई पाँच दिनअघि थप उपचारकालागि हेलिकप्टरमार्फत झापाकै बिर्तामोडस्थित विएण्डसी अस्पतालमा भर्ना गरिएको थियो । उपचारकै क्रममा उप्रेतीको सोमबार साँझ वीएण्डसी अस्पतालमा मृत्यु भएको अस्पतालका जनसम्पर्क अधिकृत प्रमिश गिरीले जानकारी दिए । योसँगै झापामा कोरोना संक्रमणबाट मृत्यु हुनेको संख्या १३६ पुगेको छ ।
