झापा / झापामा कोरोना संक्रमणका कारण थप एक जनाको मृत्यु भएको छ । विर्तामोडका नबराज सापकोटाको आज बिहान उपचारका क्रममा विराटनगरमा मृत्यु भएको जिल्ला स्वास्थ्य कार्यालय झापाका फोकल पर्सन जिवन चौंलागाइँले पुष्टि गरे । उनको मृत्यु कोरानाकै कारण भएको पुष्टि भएपनि विस्तृत विवरण प्राप्त भइनसकेको उनले जनाएका छन । यससंगै झापामा संक्रमणका कारण मृत्यु हुनेको संख्या १३३ पुगेको छ । दमक, विर्तामोड, गौरीगञ्ज , काँकरभिट्टा लगायतका ठाउँमा अहिले कोरोनाको संक्रमण बढी फैलिएको पाइन्छ ।
दमकमा एक जना वडाध्यक्षलाई पनि कोरोना संक्रमण पुष्टि भएको छ । दमक २ का वडाध्यक्ष प्रजापति सापकोटालाई हिजो बुधबार कोरोना पुष्टि भएपछि आज ( बिहिबार) थप उपचारका लागि विराटनगर लगिएको छ । उनलाई श्वास प्रश्वास, खोकी र ढाड दुख्ने जस्ता लक्षणका कारण समस्या भएकाले थप उपचारका लागि आज बिहान विराटनगरस्थित विराट मेडिकल लगिएको हो ।
