कनकाई खबर \ झापाको कनकाई ३ स्थित सुरुङ्गामा आयोजित १ नम्बर प्रदेशस्तरीय प्रथम भेट्रान कप फुटबल प्रतियोगिताको उद्घाटन खेलमा आयोजक कनकाई भेट्रान क्लब विजयी भएको छ । जीतसँगै आयोजक सेमिफाइनलमा प्रवेश गरेको हो ।
कनकाई माविको खेलमैदानमा शनिबारदेखि सुरु प्रतियोगितामा आयोजकले ३–० गोलअन्तरले भद्रपुर भेट्रान क्लबलाई पराजित गरेको हो । आयोजकका लागि तीन वटै गोल दोस्रो हाफमा सम्भव भएको थियो । प्रतिस्पर्धात्मक खेलमा आयोजकका लागि भुपेन लिम्बूले पहिलो गोल खेलको ४७औँ मिनेटमा गरेका थिए । त्यस्तै, रमेश बाँस्तोलाले ५८औँ र नरेन्द्रमणि लिम्बूले ७३औँ मिनेटमा गोल गरेर टिमका लागि जीत सुनिश्चित गरे ।
खेलको म्यान अफ दी म्याच पहिलो गोलकर्ता भुपेन लिम्बू घोषित भए । उनलाई युवा व्यवसायी श्याम प्रसाईले नगद २ हजार प्रदान गरे । उनको खेल मन पराएर स्थानीय खेलप्रेमी लय उप्रेतीले पनि नगद ५ सय पुरस्कार प्रदान गरे ।कनकाई भेट्रान क्लबको आयोजनामा भएको प्रतियोगितामा ८ वटा टिम सहभागी छन् । आइतबार हाम्रो इटहरी भेट्रान क्लब र बिर्तामोड भेट्रान क्लबबीच खेल हुनेछ ।
प्रतियोगिताको उद्घाटन नेपाल विद्युत् प्राधिकरणका पूर्व कार्यकारी निर्देशक कुलमान घिसिङले गरेका थिए । उज्यालो नेपालका अभियन्ताका रुपमा परिचित घिसिङ्को सम्मान स्वरुप विभिन्न जातजातीका साँस्कृतिक प्रस्तुती समेत रहेका थिए । सोही अवसरमा घिसिङ्लाई तामाङ् घेदुङ् कनकाई नगर समितिले विशेष सम्मान गरेको थियो । क्लबका अध्यक्ष राजेन्द्र खतिवडाको अध्यक्षतामा भएको कार्यक्रममा कनकाई नगरपालिकाका प्रमुख राजेन्द्र पोखरेल, कनकाई ३ का वडाध्यक्ष रुद्रप्रसाद चिमरियाले खेलको सफलताको कामना गरेका थिए ।
प्रतियोगिताको सहआयोजकका रुपमा रहेको संस्था कनकाई खेलकुद प्रतिष्ठानका अध्यक्ष दिनानाथ खतिवडाले स्वागत मन्तव्य राखेको कार्यक्रमको संचालन सहआयोजक संस्था सुरुङ्गा जेसीजका पूर्व अध्यक्ष भिमप्रसाद भट्टराईले गरेका थिए ।
प्रतियोगिताको विजेताले नगद १ लाख १ हजार पाउँदा उपविजेताले नगद ६१ हजार र ट्रफी पाउनेछ । कनकाई भेट्रान क्लबले अन्य ९ वटा स्थानीय सामाजिक संघसंस्थालाई सहयोगी बनाएर बैशाख ४ देखि ११ गतेसम्म प्रतियोगिता संचालन गर्ने जनाएको छ । आयोजकले कनकाई उद्योग वाणिज्य संघ, कनकाई खेलकुद प्रतिष्ठान, सुरुङ्गा जेसीज, लायन्स क्लव अफ सुरुङ्गा, नेपाल रेडक्रस सोसाइटी उपशाखा सुरुङ्गा, रोटरी क्लब अफ सुरुङ्गा, ज्ञानज्योति युवा क्लब, ह्वाईट वास क्रिकेट क्लव र सुरुङ्गा सहकार्य युवा क्लवलाई प्रतियोगिताको सहयोगी संस्था बनाएको क्लवका अध्यक्ष राजेन्द्र खतिवडाले बताए । प्रदेश नम्बर १ का झापा, मोरङ र सुनसरीका गरी आठवटा टिमले प्रतियोगितामा सहभागिता जनाउने छन् ।
