कनकाई खबर \ सामाजिक क्षेत्रमा क्रियाशिल अन्तर्राष्ट्रिय रुपमा मान्यता प्राप्त रोटरी क्लव अफ सुरुङ्गाले एक दिने निःशुल्क स्वास्थ्य शिबिर सम्पन्न गरेको छ ।
रोटरी क्लव अफ सुरुङ्गा र रोट्रयाक्ट क्लव सुरुङ्गाको संयुक्त आयोजना तथा नोवेल अस्पताल विराटनगरको प्रविधिक सहयोगमा शिबिर सम्पन्न भएको हो । सुरुङ्गास्थित पशुपती अंग्रेजी माध्यमिक विद्यालयमा भएको शिविरमा १ हजार ८५ जनाको स्वास्थ्य परिक्षण गरिएको थियो । इसिजीको सेवा १ सय ७८ जनाले, ल्याब टेस्टको सेवा २ सय ३ जनाले, भिडियो एक्सरे सेवा १ सय ९८ जनाले र ४२ जनालाई दन्त सम्बन्धी सेवा प्रदान गरिएको क्लवका निवर्तमान अध्यक्ष कुमारमणी पोखरेलले जानकारी दिए ।
रोटरी क्लब अफ सुरुङ्गाका अध्यक्ष टीका प्रसाद जमरकट्टेलको सभापतित्वमा भएको कार्यक्रममा कनकाई नगरका प्रमुख राजेन्द्रकुमार पोखरेलको प्रमुख आतिथ्य रहेको थियो । रोटरी क्लबका संस्थापक अध्यक्ष एलपी उप्रेती, नोबेल मेडिकल कलेज बिराटनगरका व्यवस्थापक नारायण दाहाल , नगर उप प्रमुख मन्जु प्रसाईं लगायतले मन्तव्य राखेको कार्यक्रममा कार्यक्रम संयोजक शिवकुमार कडेलले स्वागत गर्दै स्वास्थ्य शिविरको औचित्यमाथि प्रकाश पारेका थिए । कार्यक्रमको सन्चालन सचिव तुलसी बिमलीले गरेका थिए ।
