कनकाई खबर \ कनकाई सामुदायिक वन समुहको मुख्य पाँच पदकालागि हुने निर्वाचनमा शुक्रबार उम्मेद्वारी मनोनयन भएको छ ।
आगामी तीन वर्षे कार्यकालकालागि चैत ३० गते हुने निर्वाचनमा त्रि—पक्षिय भीडन्त हुने भएको छ । स्थानीय क्रियाशिल राजनीतिक दलहरु विचमा सर्वसम्मतकालागि भएको प्रयास विफल भएपछि अन्ततः उम्मेद्वारी मनोनयन भएको हो । आ—आफ्नै राजनीतिक दलका तर्फबाट निर्वाचनमा होमिएका उम्मेद्वारहरु मध्ये मौजुदा समितिमा रहेर वन समूहको सफल नेतृत्व गरिसकेका स्थानीय सामाजिक अभियन्ता ख्याम ओलीले आफ्ना अधुरा रहेका महत्वपूर्ण योजनालाई सफल बनाउँने उद्येश्यका साथ अध्यक्ष पदकालागि पुनः उम्मेद्वारी मनोनयन गरेका छन् । स्थानीय उपभोक्ता माझ लोकप्रिय मानिएका ओली नेकपा एमालेको समर्थन प्राप्त उम्मेद्वार हुन् । ओली नेतृत्वको प्यानलमा उपाध्यक्ष पदकालागि हिरण्य राईलाई अघि सारिएको छ भने सचिव पदकालागि मेनुका मैनालीले उम्मेद्वारी मनोनयन गरेकी छन् । त्यस्तै सहसचिवमा चेतराज श्रेष्ठ र कोषाध्यक्षमा श्रीप्रसाद खरेललाई अघि सारिएको छ । खरेल यसअघिको समितिमा सहसचिवको जिम्मेवारीमा रहेका थिए ।
त्यसैगरी पछिल्लो समय सामाजिक क्षेत्रमा आफ्नो छुट्टै छवि बनाउँदै आएका युवा सन्तोष रायमाझीले समेत अध्यक्षकालागि उम्मेद्वार मनोनयन गरेका छन् । नेपाली कांग्रेसको समर्थन प्राप्त रायमाझीको नेतृत्वमा रहेको प्यानलमा उपाध्यक्ष पदकालागि ललितबहादुर कार्की र सचिवमा मान्ता खरेलले उम्मेद्वारी मनोनयन गरेका छन् । उपाध्यक्ष र सचिव पदका उम्मेद्वार कार्की र खरेलले सोही पदकालागि आफ्नो उम्मेद्वारी दोहोर्याएका हुन् । रायमाझि प्यानलमा सहसचिवमा केशव संग्रौला र कोषाध्यक्षमा गोपीलाल पाण्डेले उम्मेद्वारी मनोनयन गरेका छन् । ।
त्यसैगरी साझा विवेकशील पार्टीका तर्फबाट छुट्टै प्यानल निर्माण गरी नारायण ओली नेतृत्वको प्यानल चुनावी मैदानमा होमिएको छ । नारायण ओलीको नेतृत्वमा तेस्रो प्यानल चुनावी मैदानमा आएपछि यस पटकको निर्वाचन थप रोचक बनेको छ । नारायण ओलीको प्यानलबाट उपाध्यक्षमा जीतबहादुर श्रेष्ठ, सचिवमा अम्बिका सुवेदी सहसचिवमा सचिन लामा र कोषाध्यक्षमा खड्गप्रसाद चुडाल निर्वाचनमा होमिएका छन् ।
