कनकाईको तुलसीवारीमा संचालित फुटबल प्रतियोगिताको उपाधि इलामलाई

कनकाई खबर \ झापाको कनकाई नगरपालिका—५, तुलसीवारीमा संचालित खुल्ला नकआउट फुटबल प्रतियोगिताको उपाधि सयपत्री युवा क्लव इलामले जितेको छ ।
बिहीवार भएको उपाधि भीडन्तमा कनकाई ११ को टिमलाई १–८ गोल अन्तरले हराउँदै सयपत्रीले उपाधि रक्षा गरेको हो । उपाधिसँगै सयपत्रीले नगद २५ हजार ५ सय ५५ रुपैँया हात पारेको छ । उपबिजयी हुने कनकाईले भने १५ हजार ५५५ मा चित्त बुझायो ।
स्थानीय तुलसीवारीको देवकोटा खेल मैदानमा भएको खेलमा बिजयी टिमको तर्फबाट बबिन बोहोरा र महेस राईले ह्याट्रिक पूरा गरे भने बाकी दुई गोल विवेक मगरले गरे । कनकाईका लागि एकमात्र सान्त्वना गोल सनम राईले गरे । प्रतियोगितामा बिजयी तथा उपबिजयी हुने टिमलाई संघिय सांसद एलपीसाँबा लिम्बू, कनकाई ५ का वडाअध्यक्ष कृष्णबहादुर राई लगायातले पुरस्कार प्रदान गरे ।
प्रतियोगिताको सर्वोत्कृष्ट खेलाडी बिजयी टिमका महेस राई भएका थिए भने हाई स्कोरर कनकाई ११ का अर्जुन मर्डी घोषित भए । उनले खेलअवधिभरमा ७ गोल गरेका थिए । प्रतियोगितामा झापा, मोरङ्ग र इलामका १६ टिमको सहभागिता रहेको कनकाई ५ का खेलकुद विकास समितिका अध्यक्ष गंगा अधिकारीले बताए ।