कनकाई खबर \ कोरोना संक्रमणका कारण झापाको सुरुङ्गामा एक महिलाको मृत्यु भएको छ । कनकाई ३ सुरुङ्गा निवासी ४० वर्षिय ती महिलाको उपचारका क्रममा मृत्यु भएको कनकाईका कोरोना फोकल पर्सन लक्ष्मी अधिकारीले जानकारी दिएका छन् ।
केही दिन अघि भारतको झारखण्डस्थित पाकोड बस्तीमा घर भएकी आफ्नी छोरीसँग भेटघाटको क्रममा छोरीको घर गएकी ती महिला उतै बिरामी परेकी थिइन् । सुरुमा सामान्य रुघाखोकीको समस्या देखिएपछि भारतमै भएको उपचारपछि नेपालमा थप उपचारकालागि झापाको विर्तामोडस्थित एक अस्पतालमा भर्ना गरीएको थियो । अस्पतालमा भर्ना भए लगत्तै भएको कोरोना परिक्षणबाट उनको रिपोर्ट पोजेटिभ आएको बताइएको छ ।
भेन्टिलेटरसहितको सघन उपचार कक्षमा लगातार १० दिन सम्म उपचाररत महिलाको आज (बिहिबार) विहान अस्पतालमै निधन भएको पारिवारीक स्रोतले जनाएको छ । मृतक महिलाको शव नेपाली सेनाले परिवारसहित आफन्तको उपस्थितीमा कनकाई घाटमा अन्त्यष्टि गरेको बताइएको छ ।
महिलाको मृत्यु भएसँगै कनकाईमा कोरोना विरुद्धको अभियानमा सचेतना जगाउँन सुरु गरिएको छ । यस अघि ईलाका प्रहरी कार्यालय सुरुङ्गाले स्थानीय जनप्रतिनिधि, विभिन्न संघसंस्थाका प्रमुख तथा प्रतिनिधि, संचारकर्मीसहितको उपस्थितीमा कोरोना संक्रमणबाट हुन सक्ने सम्भावित क्षतिलाई न्युनिकरणका बारेमा अन्तरक्रिया कार्यक्रम सम्पन्न गरेको छ ।
ईलाका प्रमुख उदयशमसेर जबराको अध्यक्षतामा सम्पन्न अन्तरक्रियामा आवश्यक स्वास्थ्य सुरक्षाका मापदण्ड पूरा गर्न नगर क्षेत्रमा सचेतना जगाउँने कार्यमा सक्रियता जगाउँन सम्बन्धित सबैलाई अनुरोध गरीएको छ । नजिक आइरहेको होली पर्व लगायत सवै किसिमका चाडपर्वहरु आआफ्नै घरमा सामाजिक दुरी कायम गर्दै मनाउँन समेत अनुरोध गर्ने निर्णय भएको कनकाई नगरपालिकाका प्रवक्ता एवम् कनकाई—४ का वडाअध्यक्ष गोविन्द पौडेलले बताएका छन् । कार्यक्रममा कनकाई नगरपालिकाका वडाअध्यक्षहरु क्रमशः रोशन पोखरेल, रुद्रप्रसाद चिमरीया, गोविन्द पौडेल, कृष्णवहादुर राई, लक्ष्मीप्रसाद ओली, प्रेमबहादुर कटुवाल, कनकाई ७ की वडासदस्य गीता चौहान, जामुनबारी सामुदायिक वनका अध्यक्ष ख्यामराज सिटौला, ज्ञानज्योती युवा क्लवका उपाध्यक्ष अनुप ओली, संचारकर्मीद्वय राम निरौला, लिलाराज झापाली लगायतले आआफ्नो धारणा राखेका थिए ।
