कनकाई खबर / नेपाल बहुउद्देश्यीय सहकारी संस्था एनएमसीेले २८औं वर्षमा प्रवेश गरेको अवसरमा विभिन्न ४२ ठाउँमा स्थापना दिवस समारोह एकैसाथ सम्पन्न गरेको छ ।
संस्था स्थापना दिवसको अवसरमा झापाका ४२ स्थानमा एकै समयमा छुट्टाछुट्टै कार्यक्रम सम्पन्न गरिएको हो । एनएमसीका ४० वटा बैंकिङ कार्यालय, एनएमसी डेरी र एकीकृत नमूना कृषि फर्ममा स्थापना दिवस मनाइएको हो ।
२०५० साल फागुन २४ गते संस्था दर्ता भई काँकरभिट्टाको एउटा सानो कोठाबाट कारोबार सुरु गरेको एनएमसीले झापा जिल्लाभर सेवा विस्तार गरेको छ भने भर्खरै मात्र छिमेकी जिल्लामा पनि सेवा केन्द्र खोलेर कारोबार गर्ने अनुमति पाएको बताइएको छ ।
स्थापना समारोहका लागि संस्थाले केन्द्रीय प्रतिनिधि तोकेर विशेष मन्तव्य मार्फत संस्थाको वस्तुस्थिति अवगत गराएको थियो । सोही अन्तरगत दुर्गापुर कार्यालयमा सम्पन्न स्थापना दिवस समारोहमा केन्द्रिय प्रतिनिधिका रुपमा संस्थाको युवा सरोकार समितिका सदस्य राजकुमार कट्टेलले समग्र संस्थाको वर्तमान वित्तीय अवस्था, बैंकिङ कार्यालयमार्फत भइरहेको वित्तीय कारोबारका बारेमा बोल्दै एनएमसीका पाँचवटै कारोबारको संक्षिप्त जानकारी गराएका थिए ।
दुर्गापुर कार्यालयगत समितिका संयोजक छविलाल कोइरालाको अध्यक्षतामा सम्पन्न कार्यक्रममा वित्तिय कारोवारका हिसावले यस वर्ष उत्कृष्ट हुन सफल दुर्गापुर कार्यालय अन्तर्गतको इकाई नं.२ का पदाधिकारी तथा सदस्यहरुलाई संस्थाका तर्फबाट दोसल्ला ओढाएर विशेष सम्मान गरिएको छ । यसरी सम्मानित हुनेहरुमा इकाइ संयोजक प्रेमप्रसाद ओलीसहित सदस्यहरु सुजता निरौला, कमला अधिकारी र बजार प्रतिनिधि शान्ता अधिकारी निरौला रहेका छन् ।
दुर्गापुर कार्यालयका कार्यबाहक प्रमुख विजय ढकालले सञ्चालन गरेको कार्यक्रममा इकाइ नं. १ का संयोजक ताराप्रसाद खनाल, कर्मचारी टिका मिश्रले संस्थामा रहँदाको अनुभव प्रस्तुत गरेका थिए भने इकाइ नं.२ की सदस्य सुजता निरौलाले कविता वाचन गरेकी थिइन् ।
