कनकाई खबर \ झापाको सुरुङ्गामा संचालित छैटौ जिल्ला स्तरीय महिला फुटबल प्रतियोगिताको उपाधि आयोजक कनकाई नगरपालिकाको महिला फुटबल टिमले हात पारेको छ ।
सोमबार भएको फाइनल खेलमा अर्जुनधाराको पारीजात महिला फुटबल क्लवलाई १ – ० गोल अन्तरले पराजित गर्दै आयोजकले उपाधि हात पारेको हो ।
उपाधिसँगै कनकाई महिला फुटबल क्लवले ६५ हजार रुपैँया पुरस्कार प्राप्त गरेको छ । उपबिजयी हुने पारिजात महिला फुटबल क्लव अर्जुनधाराले ४० हजार रुपैँया प्राप्त गरेको खेल संयोजक गोविन्द सुवेदीले बताए । प्रतियोगितामा एक मात्र बिजयी गोल पहिलो हाफको ३७ औं मिनटमा कनकाईकी नेहा चौधरीले गरेकी थिइन् ।
कनकाईले पाएका करिव आधा दर्जन गोलको अवसरलाई सदुपयोग गर्न नसक्दा थप गोल सङ्ख्या थप्न सकेन । खेलको नायक बन्नुभएकी नेहा चौधरी खेलको ओमन अफ द म्याच घोषित भएकी छन् । आयोजक टिमकै सरिता सेर्पा सर्वोत्कृष्ट खेलाडी घोषित भएको बताइएको छ । बिजयी तथा उपबिजयी खेलाडीलाई कनकाई नगरपालिकाका प्रमुख राजेन्द्रकुमार पोखरेल, उपप्रमुख मन्जु प्रसाई, संविधानसभा सदस्य अम्बिका राजवंशी, कनकाई २ का वडाअध्यक्ष परशुराम गिरी, वडा नं.८ का अध्यक्ष प्रेम कटुवाल लगायतले नगद पुरस्कार, ट्रफि, मेडल तथा प्रमाणपत्र प्रदान गरेका थिए । प्रतियोगिताको आर्थिक सहयोग कनकाई नगरपालिकाले गरेको हो ।
कनकाई नगर क्षेत्रमा खेलकुद गतिविधिकै लागि ६ वर्ष अघि स्थापना भएको प्रतिष्ठानले सुरुङ्गास्थित कनकाई माविको खेल मैदानमा छैटौं संस्करणका रुपमा संचालन गरेको प्रतियोगितामा झापाका ८ वटा महिला फुटबल टिमको सहभागीता रहेको बताइएको छ । फागुन १७ गतेदेखि संचालन भएको प्रतियोगिता अन्तर्राष्ट्रिय नारी दिवसको अवसर पारेर २४ गते सोमबार समापन भएको हो । प्रतिष्ठानका अध्यक्ष दिननाथ खतिवडाको सभापतित्वमा प्रतियोगिता सम्पन्न भएको सचिव विनोद रानामगरले जानकारी दिए ।
