कनकाई खबर / प्रधानमन्त्री केपी शर्मा ओलीले नेपाल र नेपालीको जनजीवन सहज हुने गरीको सरकार नेपाली जनतालाई आवश्यक भएको बताएका छन् ।
झापाको विर्तामोडमा अत्याधुनिक उपकरण र दक्ष जनशक्तिसहितको विश्वस्तरीय उपचार सेवा दिँदै आएको पूर्वाञ्चल क्यान्सर अस्पतालको उद्घाटन गर्दै प्रधानमन्त्री केपी शर्मा ओलीले हरेक हिसाबले सजीलो हुने गरीको सरकार नेपाली जनताले चाहेको बताएका छन् ।
प्रधानमन्त्री ओली र संविधानसभा सदस्य सुवास नेम्वाङले मंगलबार अस्पताल परिसरमा आयोजित विशेष समारोहका विच क्यान्सर अस्पतालको उद्घाटन गरेका हुन् ।
उनले अस्पताल परिसरमा रहेको शिलालेख अनावरण गरी अस्पताल उद्घाटन गर्नुका साथै कक्षहरु अवलोकन पनि गरे ।
बिर्तामोड निवासी दुर्गा प्रसाईँको रु. ६ अर्ब निजी लगानीमा अस्पताल निर्माण भएको हो जसमा तीन सय शैय्या छन् । करीब एक वर्षअघि नै सेवा शुरु गरेको अस्पतालको मंगलबार विधिवत् उद्घाटन भएको हो । एक वर्षको अवधिमा करीब दुई हजार सात सय बिरामीले अस्पतालबाट सेवा लिएका छन् जसमध्ये करीब एक हजार तीन सय विरामीहरु झापाकै बासिन्दा रहेको बताइएको छ
प्रधानमन्त्री ओलीले बिएण्डसी अस्पताललाई मेडिकल कलेजको सम्बन्धन दिने प्रक्रिया अगाडि बढेको जानकारी दिए । पूर्वाञ्चल क्यान्सर अस्पताल र बिएण्डसी अस्पताल तथा मेडिकल कलेज दुवैका कार्यकारी निर्देशक दुर्गा प्रसाईं हुन् ।
ओलीले मेडिकल कलेजको सम्बन्धनको प्रक्रिया अगाडि बढेको पनि बताए । उनले बिएण्डसीलाई काठमाडौँ विश्वविद्यालयले सम्बन्धन दिन लागेको जानकारी दिए । ’बिएण्डसी टिचिङ अस्पताल बनाउने काम अगाडि बढिसकेको प्रसाईंलाई थाहा छ, यो काम अगाडि बढिसक्यो,’ प्रधानमन्त्री ओलीले भने, ’अब यो अस्पतालका रुपमा मात्र होइन, शिक्षण अस्पतालको रुपमा हुन्छ ।’
मेडिकल कलेजको सम्बन्धनका लागि भौतिक पूर्वाधार, उपकरण, जनशक्ति लगायतका मापदण्ड पूरा भएकाले कलेजलाई सम्बन्धन दिन कुनै अप्ठ्यारो नहुने प्रधानमन्त्री ओलीले प्रष्ट पारेका छन् । ओलीले देशकै लागि क्यान्सर अस्पताल गौरवको विषय भएको बताए ।
उनले पूर्वाञ्चल क्यान्सर अस्पताल अत्याधुनिक अस्पताल भएकाले अब नेपालीलाई उपचारमा सहज भएको बताए । उनले नेपाल उपचारका लागि सस्तो हुने भन्दै पूर्वाञ्चल क्यान्सर अस्पतालबाट छिमेकी देश भारतका नागरिकलाई समेत उपचारमा सहज हुने बताए ।
उद्घाटनपछि देशमा विकासको लहर छाइरहेको भन्दै दुर्गा प्रसाईं साहसी व्यक्ति भएको उनले चर्चा गरे । ओलीले कसैले आलोचना गर्दैमा प्रसाईं पछि नहट्ने मानिस रहेको बताए । आलोचनालाई ब्रान्ड बनाउने प्रसाईंको विशेषता रहेको उनको भनाइ थियो ।
