कनकाईमा जिल्लास्तरीय महिला फुटबल संचालन, उद्घाटन खेलमा कनकाईको विजय सुरुवात

कनकाई खबर \ झापाको सुरुङ्गामा संचालन भएको जिल्लास्तरीय महिला फुटबल प्रतियोगितामा आयोजक कनकाई खेलकुद प्रतिष्ठानले ५— ० को फराकिलो अन्तरले विजय सुरुवात गरेको छ ।
आज सोमबार भएको उद्घाटन खेलमा नवकिरण स्पोर्टिङ क्लव कचनकबललाई पछि पार्दै कनकाईको तर्फबाट लक्ष्मी श्रेष्ठले पहिलो हाफ्मै तीन गोल गर्दै खेललाई अग्रता दिलाएकी थिइन् । पहिलो हाफ्पछि पनि श्रेष्ठबाटै थप एक गोल भएको थियो भने खेलको ६२ औं मिनटमा कनकाईकै नेहा चौधरीले पाचौं गोल गरेर आफ्नो टिमलाई अग्रस्थानमा सुरक्षित गरेकी हुन् । खेलको म्यान अफ द म्याच कनकाईकी लक्ष्मी श्रेष्ठ घोषित भएको खेल संयोजक गोविन्द सुवेदीले जानकारी दिए । ं
कनकाई नगर क्षेत्रमा खेलकुद गतिविधिकै लागि ६ वर्ष अघि स्थापना भएको कनकाई खेलकुद प्रतिष्ठानले सुरुङ्गास्थित कनकाई माविको खेल मैदानमा छैटौं संस्करणका रुपमा संचालन गरेको प्रतियोगितामा झापाका ८ वटा महिला फुटबल टिमको सहभागीता रहने प्रतिष्ठानका अध्यक्ष दिननाथ खतिवडाले बताए । आज फागुन १७ गतेदेखि संचालन भएको प्रतियोगिता अन्तर्राष्ट्रिय नारी दिवसको अवसर पारेर २४ गतेका दिन समापन हुने बताइएको छ । प्रतियोगिताको प्रथम पुरस्कारको राशि नगद रु.६५ हजार र दोस्रो पुरस्कारको राशि ४० हजार रहेको बताइएको छ । प्रतियोगितामा म्यान अफ द म्याचको पुरस्कार स्थानीय युवा व्यवसायी अशोक बरालले सौजन्य गरेका छन् भने स्वास्थ्य सामाग्रीको व्यवस्थापन सुरुङ्गास्थित न्यूरो फार्मेसीले गरेको बताइएको छ ।
प्रतिष्ठानका अध्यक्ष दिननाथ खतिवडाको सभापतित्वमा संचालन भएको उद्घाटन खेलको प्रदेश सभा सदस्य हीराकुमार थापाले उद्घाटन गरेका हुन् । कनकाई नगरपालिकाका प्रमुख राजेन्द्रकुमार पोखरेल, उपप्रमुख मन्जु प्रसाई, वडाअध्यक्षहरु गोविन्द्रप्रसाद पौडेल, रुद्रप्रसाद चिमरिया, सुरुङ्गा खानेपानीका अध्यक्ष भीमप्रसाद अधिकारी, कनकाई उद्योग वाणिज्य संघका पूर्वअध्यक्ष कुमारमणि पोखरेल, राप्रपा नेपालका नगर उपाध्यक्ष इन्द्र रोक्का लगायातले प्रतियोगिताको सफलताको कामना गरेका थिए ।