सहारा नेपालबाट कोभिड सहायता रकम हस्तान्तरण

कनकाई खबर \ “रोग लाग्नै नदिन प्रयत्न तपाईंको , केही भएमा सहयोग गर्ने बाचा हाम्रो” भन्ने नारालाई सार्थक बनाउँदै झापाको चारपानेस्थित सहारा नेपाल बचत तथा ऋण सहकारी संस्थाले आफ्ना शेयर सदस्यहरु समक्ष कोभिड सहायता रकम हस्तान्तरण गरेको छ ।
शुक्रबार सुरुंगाको होटल डिलाइटस्थित सभा हलमा आयोजित कोभिड सहायता कार्यक्रम मार्फत संस्थाले कोरोनाबाट निधन हुने ३ जना शेयर सदस्य र १ जना कर्मचारीका परिवारलाई ९ लाख ८७ हजार ३ सय ७३ रुपैया सहायता रकम वितरण गरेको हो । संस्थाका विभिन्न शाखा मार्फत सहारामा आवद्ध शेयर सदस्यहरु मध्येबाट कोरोना पोजेटिभ भई आईसोलेसनमा बसेका ९८ जनालाई १४ दिनको आसोलेसन भत्ता वापत जनही ७ हजारका दरले ६ लाख ८६ हजार रुपैया वितरण गरिएको छ । उपचारको लागि अस्पताल भर्ना भएका १४ जना शेयर सदस्यलाई १५ लाख ९७ हजार ७ सय ६३ रुपैया प्रदान गरिएको छ ।
लकडाउनको बेला पनि अति विपन्न लघुवित्तमा आवद्ध सदस्यहरुलाई खाद्यन्न लगायतका अतिआवश्यक बस्तु उपभोग गर्नेगरी ७ हजार ८ सय १६ जनालाई २ करोड ६८ लाख २३ हजार रुपैया सापटी उपलब्ध गराएर उदाहरणीय संस्था बनेको सहारा साकोसले गत आर्थिक बर्षमा सदस्य हितका लागि १० प्रतिशत व्याज मिनाहामा ३ करोड ४५ लाख छुट प्रदान गरेको जीवन वरदान कार्यक्रमका प्रमुख भक्त खड्काले जानकारी दिए ।
‘कोभिड महासंकटको वेला सहाराले सदस्य बाहिर रहेका समुदायमा पनि उल्लेखनीय सहयोग उपलब्ध गराएको थियो । जस अनुसार प्रदेश सरकार, स्थानीय निकाय, जिल्ला विपद व्यवस्थापन समन्वय समितिसंगको सहकार्यमा क्वारेन्टाइनमा बसेका विभिन्न जिल्लाका व्यक्ती, झापाको दमकमा रहेको भुटानी शरणार्थी शिविरमा बसोबास गर्ने परिवार र प्रदेश १ का विभिन्न जिल्लामा रहेका विपन्न वर्गका परिवारमा निशुल्क खाद्यन्न वितरण र सुरक्षाकर्मीहरुलाई स्वास्थ्य सामाग्री गरी ५७ लाख ३५ हजार २ सय ५७ रुपैया राहत प्याकेज उपलव्ध गराईएको’ सहारा साकोसका कार्यकारी निर्देशक महेन्द्र गिरीले बताए । समुदाय स्तरबाट स्थापना गरिएको पिसिआर ल्यावका लागि सहयोग उपलव्ध साथै कोरोना कहरका कारण व्यापार व्यवसाय चल्न कठिन भएको अवस्थालाई मध्यनजर गरेर सरल व्याजमा कर्जा उपलब्ध गराईएको जानकारी दिईएको छ ।
संस्थाका कार्यवाहक अध्यक्ष हरिप्रसाद निरौलाको अध्यक्षतामा आयोजित कार्यक्रममा कनकाई नगरपालिकाकी उपप्रमुख मञ्जु प्रसाईको प्रमुख आतिथ्य रहेको थियो ।
कार्यक्रममा कनकाई नगरपालिका वडा नम्बर ३ का अध्यक्ष रुद्रप्रसाद चिमरिया, सुरुङ्गा जेसीज एवम् लायन्स क्लव सुरुङ्गाका संस्थापक अध्यक्ष लिलाप्रसाद चिमरिया, सुरुङ्गा खानेपानी संस्थाका अध्यक्ष भिमप्रसाद अधिकारी, कनकाई सामुदायिक बन उपभोक्ता समूहका अध्यक्ष ख्याम ओली लगायते सहारा साकोसले शेयर सदस्य र समुदायका लागि गरेको कार्यको प्रशंसा गरेका थिए ।