कनकाई खबर / कनकाई नगरपालिकालाई उज्यालो नगरी बनाउँने अभियानको निरन्तरता स्वरुप नगरका विभिन्न वडामा निशुल्क विद्युत मिटर वितरणको कार्यलाई नगरपालिकाले तिव्रताका साथ अघि बढाएको छ ।
हाल सम्म विभिन्न समस्याका कारण विद्युत मिटर प्राप्त गर्न नसकेका विपन्न वर्ग, जाती र समुदायको पहिचान गरी नगरपालिकाले नेपाल विद्युत प्राधिकरणसँगको साझेदारीमा निशुल्क विद्युत मिटर वितरण गर्दै आएको कनकाई नगरपालिकाका प्रमुख राजेन्द्र पोखरेलले बताएका छन् । अभियानको निरन्तरता स्वरुप कनकाईको वडा नं.९ मा रहेका ४८ जना विपन्न वर्गका वडावासीलाई निशुल्क रुपमा विद्युत मिटर वितरण गर्दै नगर प्रमुख पोखरेलले नगरभित्र विविध समस्याका कारण विद्युत मिटर जडान गर्न नसक्ने कुनै पनि नगरवासीको पहिचान भएमा तुरुन्त नगरपालिकाको कार्यालयमा जानकारी गराउँन समेत सम्वन्धित वडाका वडाअध्यक्षलाई अनुरोध गरेका छन् ।
स्थानीय तहको जिम्मेवारी आँफूहरुले सम्हाल्दै गर्दा नगरका हरेक वडाका टोल टोलमा विजुलीबत्ती, सडकबाटो, सिंचाई, शिक्षा, स्वास्थ्यको सुविधा प्रयाप्त नभएका कारण स्थानीयबासीमा ठूलो समस्या भएको विगतलाई स्मरण गर्दै नगर प्रमुख पोखरेलले यो तीन वर्ष यता कम्तीमा ती समस्याहरुको पहिचान गरी समाधान तर्फ नगरपालिका अघि बढिसकेको बताए । नगरबासीको समस्या स्थानीय सरकारको समस्या भएकोले न्युनतम आधारभूत आवश्यक्ता पुर्तिकालागि स्थानीय सरकार सधैं तत्पर रहेको भन्दै कनकाई नगर प्रमुख पोखरेलले वर्तमान असहज परिस्थितीमा समेत सम्पूर्ण नगरवासीलाई निराश नभई स्थानीय जनप्रतिनिधिहरुसँग सहकार्य गरेर उद्यमशिल बन्न अनुरोध गरेका छन् ।
नगरपालिकाले यस अघि पनि अन्य विभिन्न वडामा निशुल्क विद्युत मिटर वितरण गरेको बताइएको छ ।वडाअध्यक्ष प्रेमप्रसाद राजवंशीको सभापतित्वमा सम्पन्न विद्युत मिटर वितरण कार्यक्रममा प्राधिकरण अनारमनि वितरण केन्द्रका प्रमुख विरेन्द्रकुमार झा, सिनियर इन्जिनियर एलिना पराजुली, इन्जिनियर गजेन्द्रप्रसाद यादव, कार्यपालिका सदस्य चुवालाल राजवंशी, वडासदस्यहरु राजेन्द्र आङबुहाङ, नरमान श्रेष्ठ लगायतले सहजीकरण गरेका थिए । वडामा विद्युत विस्तार तर्फ यस अघि नै २ वटा ट्रान्सफरमर जडान गरी आवश्यक्ताअनुसार विद्युत पोल र तार विस्तार समेत गरीएको वडाअध्यक्ष राजवंशीले वताएका छन् । वडाका अन्य केही ठाउँमा देखिएको विद्युत सेवा विस्तार साथै मर्मत कार्यलाई वडा कार्यालयले सहजीकरण गरिहेको वताइएको छ ।
आदिवासीहरुको प्राचिन थलोका रुपमा रहेको कनकाई नगरको वडा नं.९ विशेष गरी कोच राजवंशी समुदायको बाहुल्यता रहेको वडाका रुपमा परिचित छ । कोच राजवंशी लगायत विभिन्न जातजाती, धर्म संस्कृति र सम्प्रदायका मानिसहरुको बसोबास रहेको यस वडामा जनप्रतिनिधिले स्थानीय तहको जिम्मेवारी सम्हाले यता वडाको चौतर्फी विकासमा थप टेवा पुगेको स्थानीयबासी बताउँछन् ।
