कनकाई खबर डेक्स \ सुरुङ्गा जेसीजको वार्षिक क्यालेन्डर अनुसार जारी जेसीज सप्ताहको तेस्रो दिन आइतवार जेसीजले वृक्षरोपण कार्यक्रम सम्पन्न गरेको छ ।
“ग्रीन सिटी क्लिन सिटी सुरुङ्गा ” भन्ने सुरुङ्गा जेसीजको मुख्य नारालाई निरन्तरता दिँदै स्वस्थ र स्वच्छ समाज निर्माणका लागि जेसीजले वृक्षरोपण कार्यक्रमलाई अभियानका रुपमा अघि वढाएको हो । कनकाई नगरका हरेक टोल टोलमा वृक्षरोपण गरेर सुन्दर, शान्त, सफा र हरियाली नगर निर्माण गर्ने कार्यलाई जेसीजले अभियानका रुपमा निरन्तरता दिएको सुरुङ्गा जेसीजका अध्यक्ष भिमप्रसाद भट्टराईले वताएका छन् । संस्थाको स्थापनाकालदेखी नै हरेक वर्ष विभिन्न चरणमा सुरुङ्गा जेसीजले वृक्षरोपण संचालन गर्दै आएको अध्यक्ष भट्टराईले वताएका छन् ।
विरुवाको संरक्षण गर्न स्थानीयवासीलाई जिम्मेवार वनाउँदै जेसीजले पहिलो चरणमा वजार क्षेत्रमा रहेका मुख्य सडक वाटाहरुलाई लक्षीत गरी गमलामा धुपीका विरुवा रोपीएको छ । सोही अनुरुप आइतवार सुरुङ्गा चौकदेखी उत्तरतर्फ कालीस्थान सम्मको भित्री सडकमा वृक्षरोपणको सुरुवात गरेको जेसीज सप्ताह मूल समितिका संयोजक कमल कट्टेलले वताएका छन् ।
कार्यक्रमका प्रमुख अतिथी सुरुङ्गा खानेपानी तथा सरसफाई उपभोक्ता समितिका अध्यक्ष प्रेमप्रसाद दहाल र सुरुङ्गा जेसीजका अध्यक्ष भीमप्रसाद भट्टराईले स्थानीय सिंहवाहिनी टोल विकास संस्थाकी अध्यक्ष निर्मला चाम्लिङ् र कालीस्थान टोलविकास संस्थाका सचिव प्रविण आचार्यलाई संयुक्त रुपमा विरुवा हस्तान्तरण गर्दै संरक्षणका लागि अनुरोध गरेका थिए । एक हप्तासम्म विविध कार्यक्रमका साथ संचालन हुने जेसीज सप्ताहको चौथो कार्यक्रम सोमवार विहान ८ वजे व्याडमिन्टन प्रतियोगिता संचालन गरीने वताइएको छ ।
सुरुङ्गा जेसीजका अध्यक्ष भट्टराईको सभापतित्व एवम् सुरुङ्गा खानेपानी तथा सरसफाई उपभोक्ता समितिका अध्यक्ष प्रेमप्रसाद दहालको प्रमुख आतिथ्यता रहेको कार्यक्रममा सुरुङ्गा जेसीजका मानार्थ सदस्य श्याम पौडेल, पूर्व अध्यक्ष शिवकुमार कडेल, निर्मला चाम्लिङ्, प्रविण आचार्य लगायतले मन्तव्य राखेका थिए । कार्यक्रम संयोजक राजकुमार कट्टेलले औचित्यसहित स्वागत गरेको कार्यक्रमको संचालन सुरुङ्गा जेसीजका सचिव त्रिलोचन उप्रेतीले गरेका थिए ।
