कनकाई खबर / विश्वव्यापी महामारीका रुपमा फैलिएको कोरोना भाइरसका कारण स्थगीत भएको कक्षा १२ को परीक्षा मंगलबारदेखि संचालन भएको छ ।
कनकाई नगर क्षेत्रका सरकारी र निजी गरी ५ सय ८८ विद्यार्थी साथै देशभरका करिब ४ लाख ३२ हजार विद्यार्थीहरु परीक्षामा सामेल भएका छन् । नेपाल सरकारले जारी गरेको आवश्यक स्वास्थ्य सुरक्षा अपनाउँदै विद्यार्थी स्वयम् उपस्थित भई शान्तीपूर्ण रुपमा परीक्षा संचालन हुँदै आएको सम्बन्धित विद्यालयका केन्द्राध्यक्षहरुले जानकारी दिएका छन् । मास्कको प्रयोग अनिवार्य गरिएको परीक्षा केन्द्रमा हेल्थ डेक्स स्थापना गरी साबुनपानीले हात धुने व्यवस्था गर्नुका साथै थर्मल गन, सेनीटाइजरको समेत व्यवस्था गरेको बताइएको छ । विद्यार्थीहरुको भौतिक दुरी कायम गरी संचालन भएका परीक्षामा यहाँस्थित कनकाई बहुमुखी क्याम्पस सुरुङ्गाका नियमित तर्फ ९२ जना र ७ जना आंशिक तर्फका विद्यार्थीहरुले परीक्षा दिइरहेको क्याम्पस प्रमुख एवम् केन्द्राध्यक्ष विकास उप्रेतीले जानकारी दिएका छन् ।
सरकारी विद्यालय तर्फ कनकाई माविमा नियमित तर्फका २६० मध्ये ६ जना अनुपस्थित रहेका छन् भने आंशिक तर्फ ३० जना विद्यार्थी परीक्षामा सहभागी छन् । अन्य २३ जना जिल्ला बाहिरका विभिन्न विद्यालयका विद्यार्थीहरुले समेत परीक्षामा सहभागित जनाएको कनकाई माविका सहायक प्रधानाध्यापक एवम् केन्द्राध्यक्ष चन्द्र शिवाकोटीले जानकारी दिएका छन् । त्यस्तै कनकाईको आदर्श मावि घैलाडुवामा नियमित तर्फका ४४ र आंशिक तर्फका १९ जना विद्यार्थीहरु परीक्षामा सहभागी भएको विद्यालयका प्रधानाध्यापक एवम् केन्द्राध्यक्ष धर्मानन्द निरौलाले जानकारी दिएका छन् । त्यस्तै भृकुटी मावि दुर्गापुरमा नियमित तर्फका ४४ जना मध्ये तीनजना अनुपस्थित रहेका छन् भने आंशिक तर्फ ४ जना विद्यार्थीहरुले परीक्षा दिइरहेको विद्यालयकी प्राचार्य एवम् केन्द्राध्यक्ष अञ्जना शिवाकोटीले बताएकी छन् ।
कनकाईमा निजी तर्फ पशुपति अंग्रेजी माविमा नियमित तर्फका ५२ जना र अन्य जिल्लाका एकजना गरी ५३ जनाले परीक्षा दिइरहेको विद्यालयका प्रिन्सिपल एवम् केन्द्राध्यक्ष एलपी उप्रेतीले जानकारी दिए । त्यस्तै झापा मेरीगोल्ड अंग्रेजी माविमा नियमित तर्फ ९२ जना विद्यार्थी परीक्षामा सामेल रहेको विद्यालयका प्रिन्सिपल एवम् केन्द्राध्यक्ष गोकुल उप्रेतीले जानकारी दिए । त्यस्तै हरीकुल नमूना अंग्रेजी माविमा नियमित तर्फ तीन जना र आंशिक तर्फ एकजना विद्यार्थी परीक्षामा सामेल रहेको विद्यालयका प्रिन्सिपल एवम् केन्द्राध्यक्ष रोशन केसीले जानकारी दिएका छन् ।
देशभर चार हजार एक सय पाँच वटा परीक्षा केन्द्र तोकिएको छ । परीक्षा बिहान ८ बजेदेखि सुरु भएको छ । परीक्षामा ढुक्क भएर सहभागी हुन सरकारले सम्बन्धित विद्यार्थीसँग आग्रह गरीसकेको छ । शिक्षा, विज्ञान तथा प्रविधि मन्त्री गिरिराजमणि पोखरेलले परीक्षा केन्द्रमा सबै स्वास्थ्य मापदण्ड पालना हुने भएकाले ढुक्क हुन आग्रह गरेका हुन् ।
विद्यार्थी धेरै रहेको परीक्षा केन्द्रले स्वास्थ्य सुरक्षा पालनामा विशेष ध्यान दिन राष्ट्रिय परिक्षा बोर्डले निर्देशन दिएको छ । कोरोना संक्रमण भएका र परीक्षामा बस्न नसक्ने परीक्षार्थीलाई अर्को परीक्षा सञ्चालन गरिने जनाइएको छ । कोरोना संक्रमण पुष्टि भएर पनि परीक्षामा बस्न सक्ने विद्यार्थीका लागि भने छुट्टै स्थानको व्यवस्था गरिएको छ । बोर्डका सदस्य सचिव दुर्गा अर्यालले सबै विद्यालयमा उत्तरपुस्तिका पुर्याउने, प्रश्नपत्र तयार गर्ने, केन्द्राध्यक्षलाई तालिम दिने, स्वास्थ्य मापदण्ड कार्यान्वयन गर्नेसहित सम्पूर्ण काम यस अघि नै भएको जानकारी दिए ।
परीक्षा मंसिर १६ मा सकिनेछ । सैद्धान्तिकतर्फ कुल पूर्णाङ्कको ४० प्रतिशत मात्रै लिखित परीक्षा लिन लागिएको हो । ४० प्रतिशत कक्षा ११ मा प्राप्त गरेको अंक र बाँकी २० प्रतिशत विद्यालयको आन्तरिक मूल्याङ्कनको आधारमा दिइने बोर्डले जनाएको छ । गएको वैशाख ८ गतेदेखि सञ्चालन हुनुपर्ने परीक्षा कोरोना सक्रमण जोखिमका कारण स्थगित भएको थियो ।
