कनकाई खबर डेक्स \ सुरुङ्गा जेसीजले आफ्नो वार्षिक क्यालेन्डर अनुसार शुक्रवारदेखी विविध कार्यक्रमका साथ जेसीज सप्ताह सुरु गरेको छ ।
जेसीजको एक विशेष पर्वका रुपमा मानिने जेसीज सप्ताह कार्यक्रमको पहिलो दिनको उद्घाटन कार्यक्रम वक्तृत्व कलावाट सुरु भएको छ । एक हप्तासम्म विविध कार्यक्रमका साथ संचालन हुने अन्य कार्यक्रमहरुमा क्रमशः पर्यटकीय क्षेत्र धनुषकोटी धामदेखी कनकाई सामुदायिक वनसम्म मिनी म्याराथुन दौड, सुरुङ्गा चौकदेखी उत्तर तर्फ कालीस्थान सम्म वृक्षरोपण, व्याडमिन्टन प्रतियोगिता, फरक क्षमता भएका विद्यार्थीहरुलाई आवश्यक सामाग्री वितरण, आदर्श मावि घैलाडुवामा न्यानो कपडा वितरण साथै सोही स्थानमा जेष्ठ नागरीकहरुलाई लक्षित गरेर मनोरञ्जनात्मक कार्यक्रम संचालन हुने जेसीज सप्ताह कार्यक्रमका मूल संयोजक कमल कट्टेलले वताएका छन् ।
जेसीज सप्ताहको उद्घाटन कार्यक्रमको पहिलो दिन सम्पन्न भएको वक्तृत्व कला प्रतियोगितामा स्थानीय निजी तथा सामुदायिक गरी सातवटा विद्यालयका विद्यार्थीहरुको सहभागिता रहेको जनाइएको छ । सहभागी मध्ये झापा मेरीगोल्ड अंग्रेजी माविका वेदान्त तिम्सिना प्रथम, मेची अंग्रेजी मावि माइधारका रक्षा देउजा दोस्रो र पशुपति अंग्रेजी मावि सुरुङ्गाका जेना शिवाकोटी तेस्रो भएका छन् । “परिवर्तनका लागि सुरुवात ” शिर्षक रहेको वक्तृत्वकला प्रतियोगितामा विजेता तीनैजनालाई कार्यक्रमका प्रमुख अतिथी जेसीज भवन निर्माणार्थ जग्गादाता घनश्याम वराल र सुरुङ्गा जेसीजका अध्यक्ष भिमप्रसाद भट्टराईले नगद पुरस्कार सहित प्रमाण पत्र र ट्रफी प्रदान गरेका थिए ।
अन्य सहभागी विद्यालयहरुमा कनकाई मावि सुरुङ्गा, देवकोटा एजुकेशन फाउण्डेशन, चम्पा फ्लावर्स र विद्योदय अंग्रेजी मावि रहेका छन् । प्रतियोगिताको निर्णायक मण्डलमा कनकाई वहुमुखी क्याम्पसका उपप्राध्यापक रुद्रवहादुर थापा र विर्ता लेडी जेसीजकी युनिता दवाडी रहेका थिए । सुरुङ्गा जेसीजका अध्यक्ष भिमप्रसाद भट्टराईको सभापतित्वमा सम्पन्न उद्घाटन समारोहमा पूर्व अध्यक्ष एवम् कनकाई उद्योग वाणिज्य संघका अध्यक्ष कुमारमणि पोखरेल, भद्रपुर जेसीजका अध्यक्ष सोम ढुङ्गेल, जेष्ठ नागरिक संघ कनकाई नगरका अध्यक्ष पुण्यप्रसाद वाराकोटी, कनकाई माविका प्राचार्य निर्मलकुमार खतिवडा, नवयुग शिक्षा निकेतन दुर्गापुरका प्रिन्सिपल अखिल कोइराला लगायतले मन्तव्य राखेका थिए । प्रतियोगिताकी संयोजक सुरुङ्गा जेसीजकी कार्यकारिणी उपाध्यक्ष उषा उप्रेतीले औचित्य सहित स्वागत गरेको कार्यक्रममा उपाध्यक्ष पुष्पा कडेलले आस्थावाचन र सचिव त्रिलोचन उप्रेतीले कार्यक्रम संचालन गरेका थिए ।
