कनकाई खबर / झापाको कनकाईमा संघीय लोकतान्त्रिक राष्ट्रिय मञ्च, संघीय लिम्बुवान मञ्च नेपाल र कनकाई नगर वडा नंं. ७ वडा समितिको संयुक्त आयोजनामा शुभकामना आदानप्रदान साथै राजनैतिक प्रशिक्षण कार्यक्रम सम्पन्न भएको छ ।
नेपालीहरुको महान मौलिक चाडपर्वको अवसर पारेर दुर्गापुरस्थित सामुदायिक भवनमा संचालन गरीएको अन्तरक्रियामूलक कार्यक्रम मञ्चका कनकाई ७ का वडा अध्यक्ष बसन्त मेन्याङ्बोको सभापतित्वमा सम्पन्न भएको छ । पार्टीका केन्द्रिय. उपाध्यक्ष ज्ञानुहाङ इम्बुङको प्रमुख आतिथ्यता रहेको कार्यक्रमको औचित्यमाथि प्रकाश पार्दै प्रमुख अतिथि ज्ञानुहाङ इम्बुङले वर्तमानमा उठिरहेको पहिचान सम्बोधन र १०ं + १ प्रान्तको माग स्पष्ट रुपमा जातिवादी नभएको बताए । सबै खाले उत्पीडनको बिरुद्ध र मुक्तिकोलागि दाप सहितको खुकुरी चुनाव चिन्ह रहेको पार्टी संघीय लोकतान्त्रिक राष्ट्रिय मञ्च, नेपालमा गोलबद्ध हुन कार्यक्रममा उपस्थित सबैमा आग्रह गरेका थिए ।
कार्यक्रमको विशिष्ट अतिथिका रुपमा रहेका प्रमुख प्रशिक्षक पार्टीका उपमहासचिव भानु भट्टराई, त्यस्तै विशिष्ट अतिथी तथा प्रशिक्षक झापा जिल्ला अध्यक्ष धनबहादुर पङ्धाक, अर्का विशिष्ट अतिथी प्रान्तीय सचिव राजु राई, कनकाई नगर अध्यक्ष हाङ्बीर कुलुङ राई लगायतको सहभागिता रहेको थियो ।
करीब २ घण्टा सम्म चलेको प्रशिक्षण कार्यक्रममा प्रशिक्षकद्वयले नेपालको बैकल्पिक शक्तिको रुपमा ०६२ सालमा स्थापित पार्टी संघीय लोकतान्त्रिक राष्ट्रिय मञ्च, नेपालको नव दर्शन “सहअस्तित्ववाद”, पहिचानको आन्दोलनको औचित्य र पहिचान सहितको संघीयतामा लिम्बुवानको सम्भावना, महत्व, रणनीति र भावी कार्यदिशाबारे प्रष्ट पारेका थिए । कार्यक्रममा ३० जना भन्दा बढीलाई क्रियाशिल सदस्यता वितरण गरिएको थियो ।
संघीय लिम्बुवान मञ्चका कनकाई नगर वडा नं.७ का उपाध्यक्ष सन्जिव लकान्द्रीले स्वागत गरेको कार्यक्रममा पार्टीका वडा सदस्य गीता नेम्बाङले औचित्यमाथी प्रकाश पारेकी थिइन् । कार्यक्रमको संचालन पार्टीका कनकाई ७ का वडा मञ्च सचिव महेन्द्र कन्दङ्वाले गरेका थिए ।
