कनकाई खबर \ सहारा नेपाल(साकोस) सेवा केन्द्र सुरुङ्गाले संस्थाको सामाजिक सुरक्षा कार्यक्रम अन्तर्गत चाडपर्व लक्षित सामाजिक सुरक्षा भत्ता घर घरमै वितरण गरेको छ ।
संस्थाको सवै सेवा केन्द्रमा रहेका एकल महिला, एकल पुरुष, जेष्ठ नागरिक, जेष्ठ सदस्य पोषण, असक्त र अपाङ्गलाई सहयोग स्वरुप संरक्षण भत्ता वितरण गरिएको हो । यसै क्रममा सुरुङ्गा सेवा केन्द्रले शुक्रवार र शनिवार गरी आफ्नो सेवा क्षेत्रका ३९ जना एकल महिला सदस्यलाई जनही ८ हजार रुपैयाँ वितरण गरेको सेवा केन्द्र प्रमुख टिकावहादुर प्रधानले जानकारी दिएका छन् । प्रत्येक सदस्यका घरमै गएर उनीहरुलाई रकम हस्तान्तरण गरिएको प्रधानले बताए ।
विश्व व्यापी महामारीका रुपमा फैलिएको कोरोना भाइरसका कारण सहाराले घर–घरमा गएर भत्ता वितरण गर्दा एकल महिलाहरुले केही राहतको महसुस गरेका थिए । आफ्नो श्रीमानको निधन भएपछि एकल महिलाको रुपमा बस्दै आएकी कनकाई ३ निवासी ३९ वर्षिय निशा बुढाथोकीले सहारा नेपाल साथै यसका कर्मचारीहरुलाई धन्यवाद दिँदै चाडपर्वका मुखमा सहाराले गरेको सहयोग ज्यादै महत्वपूर्ण भएको बताएकी छिन् । बुढाथोकीले मात्र हैन कोरोना महामारीको वर्तमान अवस्थामा घर घरमै आएर दशैं खर्च दिने सहारा नेपाल(साकोस)को जति गुणगान गाएपनि अपुग हुने भन्दै संस्थाको सेवा भावको सबैले प्रशंसा गरेका छन् ।
सामाजिक सुरक्षा भत्ता वितरण कार्यक्रममाा सेवा केन्द्र सुरुङ्गाका सहयोग उपसमिति संयोजक खड्ग प्रसाईँ, सदस्यहरु विनोद थपलिया, खिनमाया बस्नेत, होमप्रकाश विमली, सेवा केन्द्र प्रमुख टिकावहादुर प्रधान, कर्मचारीहरु विवेक खतिवडा, शान्ता पोखरेल लगायतले एकल महिला सदस्यहरुलाई घरैमा गएर चेक हस्तान्तरण गरेका हुन् ।
संस्थाले एकबर्षको अवधिमा विभिन्न सामाजिक कार्य गरेको छ । संस्थाले कोरोना भाइरस महामारीका समयमा राहत वितरण, समुदायको सहयोगमा पिसिआर ल्याब संचालन, ट्राफिक सचेतना, सदस्यहरुलाई विभिन्न सीपमुलक तालिम, आँखा शिविर सञ्चालनसहित विभिन्न ३९ वटा महत्वपूर्ण कार्यहरु सम्पन्न गरिसकेको बताइएको छ ।
