कनकाई खबर \ श्रीमतीको हत्या आरोपमा पक्राउ परेका झापा कमल गाउँपालिकाका भीम भण्डारीलाई जिल्ला अदालत झापाले अनुसन्धानका लागि सात दिन म्याद थप गरेको छ।
घटनाको विस्तृत स्थलगत अध्ययन, स्थानीयसँगको सोधपुछ, प्रारम्भिक वयानका आधारमा अनुसन्धानका लागि जिल्ला अदालतबाट थप सात दिनको म्याद पाएको जिल्ला प्रहरी कार्यालय झापाका प्रवक्ता डिएसपी राकेश थापाले जानकारी दिए। प्रारम्भिक अनुसन्धानले ६४ वर्षीय भण्डारी नै श्रीमती मनमाया भण्डारीको हत्यामा संलग्न रहेको देखिएको प्रहरीले जनाएको छ। उनलाई बिहीबार साँझ इलाका प्रहरी कार्यालय दमकले नियन्त्रणमा लिएर अनुसन्धान सुरू गरेको थियो।
घटना भएदेखि नै प्रहरीले मनमायाका परिवारका सदस्यहरूलाई निगरानीमा राखेको छ। पोष्टमार्टम रिपोर्ट अनुसार हत्या भएको समय मृतक मनमाया र हत्या आरोपी उनका श्रीमान् सँगै थिए।
हत्यामा बाहिरका अन्य मानिसको संलग्नता नदेखिएको प्रहरीले जनाएको छ।
