कनकाई खबर \ कोरोनाको कारण झापाको कनकाई नगरपालिका वडा नं. ९ का ४६ वर्षीय पुरुषको गएराति मृत्यु भएको छ । थप उपचारका लागि विराटनगर ल्याइएका कोरोना भाइरस संक्रमित पुरुषको कोशी अस्पताल कोभिड-१९ उपचार केन्द्रमा शनिबार राति मृत्यु भएको छ ।
कोभिड अस्पताल ल्याइपुर्याउन साथ राति १०ः४५ बजेतिर मृत्यु भएको अस्पतालका व्यवस्थापक ज्ञानबहादुर बस्नेतले जानकारी दिए । उनका अनुसार असोज ८ गते कोरोना पुष्टि भएपछि पुरुषलाई झापाकै मेची अस्पतालमा उपचारका लागि भर्ना गरिएको थियो ।
शरीर कमजोर हुने, ज्वरो आउने लगायत कोरोनासँग मिल्ने लक्षण देखिएपछि स्वाब संकलन गरेर पीसीआर परीक्षण गराउँदा पुरुषको रिपोर्ट पोजेटिभ आएको उनको भनाइ छ ।
झापामा उपचाररत रहँदाको अवस्था गम्भीर बन्दै गएपछि शनिबार राति थप उपचारका लागि विराटनगर ल्याइएको बस्नेतको भनाइ छ । तर, उपचारका लागि आइसोलेसनमा लैजानलाई बोकेर आएको एम्बुलेन्सबाट झार्दाझार्दै संक्रमितको मृत्यु भएको चिकित्सकलाई उद्रित गर्दै उनले बताए ।
‘स्वास्थ्य अवस्था नाजुक भएर उपचारका लागि विराटनगर ल्याइएको रहेछ,’ उनले भने, ‘तर उपचारक लागि कोभिड अस्पतालको आइसोलेसनमा भर्ना गर्न नपाइकन एम्बुलेन्सबाट झार्दाझार्दै मृत्यु भयो ।’
उपचारकालागि ल्याउन ढिला भएका कारण संक्रमित पुरुषलाई बचाउन नसकिएको अस्पतालले जनाएको छ । बस्नेतले शवको व्यवस्थापन नियम अनुसार हुने जानकारी दिए । संक्रमित ती पुरुषमा उच्च रक्तचाप र मधुमेहको पनि समस्या रहेको थियो । उनी आदर्श माविका कर्मचारी र व्यवसायी समेत हुन् । योसँगै कनकाई नगरपालिकामा मृत्यु हुनेको संख्या दुई पुगेको छ ।
