कनकाई खबर \ झापा गाउँपालिकाको वडा नं.६ मा कोरोना संक्रमणका कारण एक ७७ वर्षिय वृद्धको गएराति मृत्यु भएको छ ।
मृतक वृद्धमा कोरोना भाइरसको संक्रमण पुष्टि भएको झापा गाउँपालिकाका स्वास्थ्य शाखा प्रमुख लक्ष्मण बिश्वकर्माले बताए । मृत्यु भएका वृद्धको शव स्थानीय रानी सामुदायिक वन क्षेत्रमा नेपाली सेनाले व्यवस्थापन गरेको पालिका स्वास्थ्य प्रमुख बिश्वकर्माले कनकाई खबरलाई जानकारी दिए ।
मृतकका छोरा झापाको बिर्तामोडबाट गत भदौ २४ गते बुबा भेट्न आएका थिए । त्यसपछि असोज ३ गते आएको छोराको पिसिआर रिपोर्टबाट कोरोना संक्रमण पुष्टि भएको थियो । छोराले भेटेर गएपछि मृतकमा सामान्य ज्वरो,रुघाखोकीको लक्ष्यण देखिएको थियो । क्रमशः रुघाखोकीले च्याप्दै गएपछि गाउँपालिकाले तीनदिन अघि सोही क्षेत्र आसपासका ३२ जनाको स्वाब संकलन गरेर पिसिआर परीक्षण गरेको थियो । परीक्षण गरिएका मध्ये अन्य सबैको रिपोर्ट नेगेटिभ आए पनि मृतक वृद्धको भने रिपोर्ट पोजेटिभ आएको बताइएको छ । लामो समयदेखि श्वासप्रश्वास सम्बन्धित समस्यामा रहेका वृद्धको गएराति निधन भएपनि रिपोर्ट भने आज बिहिबार बिहान मात्र पुष्टी भएको बताइएको छ ।
वृद्धको मृत्यु भएपछि झापाको दक्षिणी क्षेत्र भारतसँग सिमा जोडिएको झापा गाउँपालिकाको वडा नंं.६ लाई तीन दिनकालागि (सिल) निषेधाज्ञा जारी गरिएको छ । कोरोनाका कारण मानवीय क्षति सहितको संक्रमण फैलिएको भन्दै यसको नियन्त्रण तथा रोकथामकालागि गाउँपालिका अध्यक्ष जयनारायण शाहको उपस्थितीमा वडास्तरीय विपद व्यवस्थापन समिति साथै सम्बन्धित सबै पक्ष बिचमा बसेको आकस्मीक बैठकले निषेधाज्ञा जारी गर्ने निर्णय गरेको वडा सचिव पूर्णचन्द्र मैनालीले जानकारी दिएका छन् ।
वडा नं.६ का वडाअध्यक्ष हरिबहादुर बानीयाँको अध्यक्षतामा बसेको समितिको बैठकले वडाको पूर्वमा बिरिङ खोला, पश्चिममा सानो माइखोला, उत्तरमा कनकाई नगरपालिकाको सिमाना र दक्षिणमा फूलगाछी चोक सम्मको क्षेत्रमा अतिआवश्यक सेवा बाहेक अन्य गतिविधि गर्नकालागि आज असोज ८ गते साँझ ५ बजेदेखि असोज ११ गते राती १२ बजे सम्मलाई निषेध गरिएको बताइएको छ ।
समितिको बैठकले निषेधाज्ञा जारी भएको समयमा अत्यावश्यक स्वास्थ्य सेवाहरु नियमित संचालन गर्न पाइने, क्वारेन्टिन प्रयोजनकालागि संचालित होटलहरु सोही प्रयोजनकालागि मात्र संचालन गर्न पाइने, अमरपथ सडक खण्डमा चल्ने सवारी साधनलाई अवरोध नगर्ने तर निषेधित क्षेत्रमा रोक्न अथवा भेला हुन नदिने निर्णय भएको वडाअध्यक्ष हरिबहादुर बानियाँले जानकारी दिए । वडाबासीलाई अत्यावश्यक काम परेमा वडाअध्यक्ष बानियाँ,स्वास्थ्य संयोजक लक्ष्मण बिश्वकर्मा तथा प्रहरी नायव निरिक्षक खड्ग गिरीलाई सुचना गरेर मात्र बाहिर निस्कन पाउँने लगायतका निर्णय भएको बताइएको छ । बैठकले निषेधाज्ञा जारी भएको समय अनुगमन अथवा समन्वयकालागि केशब बजगाईँको संयोजकत्वमा ७ सदस्यीय समिती गठन गरिएको छ ।
