कनकाई खबर \ शिवसताक्षी नगरपालिकाले गएको भाद्र १ गतेबाट गरिएको आंशिक लकडाउन आज सुक्रवारदेखि खुल्ला गरेको छ ।
नगर कार्यापालिकाको आज बसेको बैठकले स्वास्थ्य सुरक्षा र भौतिक दुरी अपनाई व्यापार व्यवसाय सञ्चालन गर्न दिइने भएको छ । बैठकले साप्ताहिक हाट, सभा, सम्मेलन, योग शिविर, जीमखाना भने अर्को सुचना नआउन्जेलकालागि बन्द गरिएको नगर प्रवक्ता नविन इजमले जानकारी दिए ।
त्यस्तै यस अघि स्थगित गरेको राष्ट्रिय परिचय पत्रको फोटो खिचाउने कार्यलाई सुचारु गर्ने नगरपालिकाले जनाएको छ । नगर भित्रका नीजि तथा सामुदायिक विद्यालयहरुमा विद्यार्थी भर्ना खुल्ला गर्ने निर्णय भएको नगर प्रवक्ता इजमले जानकारी दिए ।
विद्यार्थी सिकाई सहजीकरण निर्देशिका २०७७ को पूर्ण पालना गरी विद्यार्थी भर्ना खुल्ला गर्ने र आफुलाई सहज हुने तथा पायक पर्ने विद्यालयहरुमा आफ्ना बालबालिकाहरुलाई पठन पठानमा सहजीकरण गर्न नगरपालिकाले अनुरोध समेत गरेको छ । नगरपालिकाले कोरोना संक्रमितको संख्या बढ्न थालेपछि भाद्र १ गतेबाट नगरभित्र आंशिक लकडाउन गरेको थियो ।
