कनकाई खबर / झापाको कनकाईमा नागरिक स्तरबाट संकलन भएको एक करोड बढीको लागतमा पिसिआर ल्याब संचालनमा आएको छ ।
सरकार–समुदाय–सहकारी अभियानको साझेदारीमा सहारा नेपालसहित २८ वटा विभिन्न सामाजिक संघ–संस्थाको सहभागितामा शुरु गरिएको एकका लागि एक अभियानको अगुवाईमा स्थापना भएको ल्याबको प्रदेश नं. १ का प्रमुख सोमनाथ अधिकारी प्यासीले विधिवत रुपमा उद्घाटन गरेका छन् ।
कनकाईको कोटीहोमस्थित समर्पण राष्ट्रिय अभियानको भवनमा पाँचदिनअघिदेखि नमूना परिक्षणका रुपमा ९ सय ८० जनाको पिसिआर परिक्षण गरिएको बताइएको छ । पिसिआर ल्याब आज(बुधबार) उद्घाटन गर्दै १ नं. प्रदेश प्रमुख प्यासीले जनस्तरबाट साथ र सहयोग प्राप्तपछि संचालनमा आएको ल्याबलाई थप व्यवस्थित बनाउँदै यसको निरन्तरतामा जोड दिन सम्बन्धित सबैलाई अनुरोध गरे । प्रदेश नं.१ मा आउँन सक्ने स्वास्थ्य समस्यालाई सहज बनाउँन प्रदेश सरकार सधैं सचेत रहेको बताउँदै प्रदेश प्रमुख प्यासीले रचनात्मक कामकालागि सबै पक्षबाट सकारात्मक भूमिका खेल्नु पर्ने बताएका छन् ।
मेची प्रादेशिक अस्पताल झापाको मातहतमा रहने गरी संचालनमा आएको पिसिआर ल्याब उद्घाटन कार्यक्रममा प्रदेश नं.१ का प्रबक्ता एवम् आन्तरिक मामिला तथा कानुन मन्त्री हिक्मत कार्कीले जनताको जीउधनको सुरक्षाकालागि सरकारका सबै तहका निकाय अब थप क्रियाशिल रहनु पर्ने बताएका छन् । सबै राजनीतिक पार्टीहरुको आधारभूमि भएको झापाबाट संचालन हुने सिर्जनात्मक काममा सहयोग गर्न सम्बन्धित सबैलाई अनुरोध गर्दै मन्त्री कार्कीले झापामा संचालनमा आएको दोस्रो पिसिआर ल्याबलाई निरन्तरता दिनकालागि प्रदेश सरकारले जिम्मा लिने प्रतिबद्धता जनाएका छन् ।
तीन महिना अघि नै संचालनमा आउँनुपर्ने पिसिआर ल्याबको सेवा विस्तारमा भएको ढिलासुस्तीलाई संकेत गर्दै मन्त्री कार्कीले जनतालाई अप्ठ्यारो अवस्थामा आवश्यक स्वास्थ्य उपचारकालागि कुनै पनि बहानामा अलमल नगर्न सम्बन्धित निकायलाई अनुरोध गरेका छन् । सरकारको टेबलबाट निर्णयमा पुगेका कामहरु टेबलमै घुम्नु नहुने भन्दै मन्त्री कार्कीले त्यस्ता ढिलासुस्तीलाई कानुनी हेम्मरको आवश्यक पर्ने बताए ।
मेची प्रादेशीक अस्पतालका अध्यक्ष एवम् जिल्ला समन्वय समिति झापाका प्रमुख सोमनाथ पोर्तेलको सभापतित्व रहेको ल्याब उद्घाटन कार्यक्रममा एकका लागि एक अभियानका संयोजक महेन्द्रकुमार गिरीले कोरोना भाइरसको संक्रमण तथा नियन्त्रणमा सरकारलाई सहयोग पुर्याउन नागरिक स्तरबाट पीसीआर परीक्षण प्रयोगशाला स्थापना गरी सरकारलाई हस्तान्तरण गरेको जानकारी दिए ।
प्रदेश सभा सदस्य हीरा थापा, राष्ट्रिय सभाका पूर्व सांसद एवम् नेकपा १ नं. प्रदेशका अध्यक्ष देबराज घिमिरे, नेकपा झापाका अध्यक्ष चिन्तन पाठक, नेपाली कांग्रेस झापाका सभापति उद्धव थापा, समाजवादी पार्टी झापाका अध्यक्ष अनुतलाल राजवंशी लगायतले कनकाईको पिसिआर ल्याबलाई थप सेवासहित निरन्तरता दिनु पर्नेमा जोड दिएका छन् । अभियानका सह संयोजक विनोद बस्नेतले सहभागी सबैलाई धन्यवाद ज्ञापन गरेका थिए भने कार्यक्रमको सहजीकरण पत्रकार एकराज गिरीले गरेका थिए ।
