कनकाई खबर / बालमैत्री गाउँपालिका निर्माणकालागि पूर्वाधार निर्माण गर्दै जाने उद्येश्यका साथ राष्ट्रिय बाल दिवसको अबसर पारेर झापा गाउँपालिकामा अध्यक्ष र उपाध्यक्षसँग बालबालिका कार्यक्रम सम्पन्न भएको छ ।
गाउँपालिकाको शिक्षा शाखा एवम् महिला तथा बालबालिका शाखाको संयुक्त आयोजनामा सम्पन्न कार्यक्रम अनलाइन एप्स जुमको प्रयोग गरेर संचालन भएको हो । झापा गाउँपालिकामा रहेका १८ विद्यालयका कुल ३७ जना विद्यार्थीको सहभागीता रहेको कार्यक्रममा विद्यार्थीले गाउँपालिकाका अध्यक्ष र उपाध्यक्षसँग शैक्षिक तथा बालबालिका सम्बन्धि जिज्ञासाहरु राखेका थिए । विद्यार्थीहरुको जिज्ञासालाई गाउँपालिका अध्यक्ष जयनारायण शाह र उपाध्यक्ष कुन्तीदेवी बुढाथोकीले जवाफ दिएका थिए ।
गाउँपालिकाका शिक्षा शाखा प्रमुख जीवनप्रसाद ढकालले सञ्चालन गरेको कार्यक्रममा पालिका अध्यक्ष शाहले बालबालिकासँग भएको यस किसिमको भेटघाटबाट स्थानीय सरकारसँग बालबालिकाको सकारात्मक सम्बन्धको बिकास हुने बताए । अध्यक्ष शाहले गाउँपालिकाको विकास निर्माण लगायत प्रत्यक्ष सरोकारका विषयमा बालबालिकाको सहभागिता गराउँने प्रतिवद्धता जनाएका छन् । पालिका उपाध्यक्ष कुन्तीदेवी बुढाथोकीले प्रविधिको विकाससँगै गाउँपालिकाको शैक्षिक तथा बालबालिकासँग सम्बन्धित विषयबस्तुमा आधारित कार्यक्रमबाट सहभागी सबैलाई नयाँ कुराको ज्ञान प्राप्त भएको बताएकी छन् ।
कार्यक्रमको दोस्रो चरणमा २०७६ को एस.इ.इ परिक्षामा उत्कृष्ट भएका दुई जनालाई पुरस्कार दिइने घोषणा गरिएको थियो । जसमा डिल्लीराज माविमा अध्ययन गर्ने उत्कृष्ट छात्रछात्रा सुबास पौडेल र कामना न्यौपानेलाई जनही नगद १५ हजार सहित प्रमाणपत्र प्रदान गरिएको थियो ।
साथै वालदिवसकै अवसर पारेर गाउँपालिकाको शिक्षा शाखा एवम् महिला तथा बालबालिका शाखाको संयुक्त आयोजनामा अनलाइन बक्तृत्वकला प्रतियोगिता समेत सम्पन्न भएको थियो । प्रतियोगितामा गाउँपालिका क्षेत्रमा रहेका मावि तर्फका ८ जना र आधारभूत विद्यालय तर्फका १६ जना विद्यार्थीहरुको सहभागिता रहेको शिक्षा शाखा प्रमुख ढकालले बताएका छन् । प्रतियोगितामा मावि तर्फका विद्यार्थीहरुले ‘आजको आवश्यक्ता, विषम परिस्थितीमा वैकल्पीक शिक्षा’ विषयमा आफ्ना विचार राखेका थिए भने आधारभूत तर्फका विद्यार्थीहरुले ‘बाल दिवसको महत्व’ विषयमा आफ्ना तर्कहरु राखेका थिए । बक्तृत्वकला प्रतियोगितामा सहभागी बिजेतालाई पुरस्कार बितरणको घोषणा गरिएको थियो ।
शिक्षा शाखा प्रमुख जीवनप्रसाद ढकालको सभापतित्व एवम् गाउँपालिकाका प्रमुख प्रशासकीय अधिकृत जीवन निरौलाको प्रमुख आतिथ्यता रहेको कार्यक्रममा नेपाल शिक्षक महासंघ झापा गापाका सभापती जगन्नाथ राजबंशी, सचिव समसाद आलम,प्याब्सन झापा गापाका सचिब मनोज सुवेदी लगायतको उपस्थिति रहेको बताइएको छ । शिक्षा शाखाका स्रोत व्यक्ति खड्गप्रसाद खरेलको स्वागत तथा महिला तथा वालवालिका शाखा प्रमुख अम्बिका गौतमको संचालन रहेको वक्तृत्वकला प्रतियोगिताको निर्णायक मण्डलीमा शिक्षकहरु गोविन्द काफ्ले, नगेन्द्र सुवेदी र ईन्द्र खनाल रहेको बताइएको छ ।
