कनकाई खबर / कनकाई नगरपालिका ३ स्थित एक परिवारमा १५ दिनभित्रमा पटक पटक गरीे भएको स्वव संकलनमा १० जनाको पिसिआर रिपोर्ट पोजेटिभ आएको छ ।
स्वव संकलन गर्ने क्रममा १५ दिन अघि कनकाई नगरपालिका ३ को वडा कार्यालयमा डाटा संकलनको काम गर्ने एक महिला कर्मचारीमा कोरोना संक्रमण भएको पुष्टी भएसँगै त्यसपछि क्रमिक रुपले भएको कन्ट्रयाक ट्रेसिङका क्रममा कोरोना संक्रमितको संख्या एकाएक बढ्न थालेको हो । सोही क्रममा भएको स्वव संकलनको पिसिआर रिपोर्ट एकैदिनको नभई पटक पटक गरी १५ दिनभित्रमा एउटै परिवारमा १० जना संक्रमित हुन पुगेको कनकाई नगरपालिकाका प्रमुख राजेन्द्र पोखरेलले बताएका छन् ।
नगरबासीमा भ्रम सिर्जना नहोस् भन्ने कुरालाई प्रष्ट पार्दै नगर प्रमुख पोखरेलले कनकाई ३ को एउटै परिवारका १० जना सदस्यमा एकैदिनको नभई फरक फरक समयमा रिपोर्ट पोजेटिभ आएको जानकारी दिएका छन् । उनीहरु सवैको अवस्था सामान्य रहेको बताइएको छ । कोरोना संक्रमितका कारण विभिन्न आइसोलेशनमा रहेका नगरबासीहरुलाई कनकाई नगरपालिकाको तर्फवाट आवश्यक्ता र अवस्थालाई मध्यनजर गर्दै खाद्यान्न सामग्रीको समेत व्यवस्थापन गर्दै आएको बताइएको छ ।
विश्वव्यापी महामारीका रुपमा फैलिएको कोरोना भाइरसबाट सुरक्षित रहनकालागि नगरपालिकाले गरेको लकडाउनका कारण नगरवासीमा पर्न गएको असुविधाप्रति स्थानीय सरकार कनकाई नगरपालिका गम्भिर भएको बताउँदै नगर प्रमुख पोखरेलले बिपतको यो घडीमा आवश्यक स्वास्थ्य सुरक्षा अपनाउँन समेत नगरवासीलई अनुरोध गरेका छन् । बर्तमान अवस्थामा नगर क्षेत्रमा भएको लकडाउन कार्यन्वयनमा थप सहयोग गर्ने स्थानीय राजनीतिक दल, उद्योगी व्यवसायी, विभिन्न संघसंस्था, सुरक्षा निकाय, संचारकर्मी, बुद्धिजिवी लगायत आम नागरिकप्रति नगर प्रमुख पोखरेलले आभार प्रकट गरेका छन् ।
यसै क्रममा झापामा आज ६ वर्षीयसहित १२ जनामा कोरोना भाइरसको संक्रमण पुष्टि भएको छ । जिल्लाका पाँच स्थानीय तह शिवसताक्षी–६ मा २ महिला र ३ पुरुष गरी ५ जना, कमल–६ मा २ पुरुष, बाह्रदशी–५ मा २ पुरुष, भद्रपुरमा २ पुरुष र दमक–१० मा भारतबाट आएका एक महिलामा कोरोना भाइरसको संक्रमण पुष्टि भएको छ ।
कनकाई नगरपालिकामा हालसम्म ४८ जनामा कोरोना संक्रमण पुष्टि भएको छ। संक्रमितमध्ये ८ जना होम(आइसोलेसन, १ जना बीपी कोइराला स्वास्थ्य विज्ञान प्रतिष्ठान धरान र अर्का एक जना इलाम नगरपालिकाले स्थापना गरेको नगरस्तरीय आइसोलेसनमा रहेका नगरप्रमुख पोखरेलले बताए।
