कनकाई खबर \ झापाको शिवसताक्षी नगरपालिकाको कार्यालय एक हप्ताकालागि बन्द भएको छ ।
मंगलबार नगरपालिकाका स्वास्थ्य संयोजकलाई कोरोना संक्रमण देखिएपछि नगरपालिकाको बोर्ड बैठकले एक हप्ताकालागि कार्यालय पूर्णरुपमा बन्द गर्ने निर्णय गरेको शिवसताक्षी नगरपालिकाका प्रवक्ता एवं वडा नं.७ का वडाअध्यक्ष नविन इजमले बताएका छन । 
बैठकले कोरोना संक्रमणको अवस्थालाई मध्यनजर गर्दै एक हप्ता अर्थात भदौ महिनाभरी कार्यालय बन्द गर्ने निर्णय गरेको प्रवक्ता इजमले जानकारी दिएका छन् । पिसिआर परिक्षणकालागि स्वव संकलन गरिएका सवै कर्मचारीहरुले रिपोर्ट नआउन्जेल सम्मकालागि आवश्यक स्वास्थ्य सुरक्षा अपनाउँदै होमक्वारेन्टिनमा बस्नकालागि समेत प्रवक्ता इजमले अनुरोध गरेका छन् । बन्दाबन्दीका समयमा अन्य व्यपार व्यवसाय, बैंक वित्तिय संस्थाहरु, सवारी साधन संचालन, विभिन्न धार्मिक तथा साँस्कृतिक कार्यक्रम लगायतका गतिविधिहरु संचालनकालागि यस अघि भदौ १५ गतेको कार्यपालिकाको निर्णयअनुसार नै कार्यान्वयन हुने कुरा नगरपालिकावाट जारी सार्वजनिक सुचनामा जनाइएको छ ।
यो अवधिमा नगरपालिकाका ११ वटै वडा कार्यालयवाट भने अत्यावश्यक सेवा सुचारु गर्नकालागि वडा कार्यालयहरू खोल्ने निर्णय भएको बताइएको छ । समुदायमा कोरोना संक्रमण देखिएपछि यसअघि पनि नगरपालिका र वडा कार्यालयबाट अत्यावश्यक सेवा मात्र संचालनमा रहेको थियो । शिवसताक्षी नगर क्षेत्रमा हाल सम्ममा १२ जनालाई कोरोना संक्रमण पुष्टी भएको बताइएको छ ।
विश्वव्यापी महामारीका रुपमा फैलिएको कोरोना भाइरसबाट सुरक्षित रहनकालागि नगरपालिकाले गरेको लकडाउनका कारण नगरवासीमा पर्न गएको असुविधाप्रति स्थानीय सरकार शिवसताक्षी नगरपालिका गम्भिर भएको बताउँदै नगर प्रमुख चन्द्रकुमार शेर्माले बिपद्को यो घडीमा संयमताका साथ घरमै बस्न नगरवासीलई अनुरोध गरेका छन् । बर्तमान अवस्थामा नगर क्षेत्रमा भएको लकडाउन कार्यन्वयनमा थप सहयोग गर्ने स्थानीय राजनीतिक दल, विभिन्न संघसंस्था, सुरक्षा निकाय, संचारकर्मी, बुद्धिजिवि लगायत आम नागरिकप्रति नगर प्रमुख शेर्माले आभार प्रकट गर्दै आवश्यक स्वास्थ्य सुरक्षा अपनाउँन समेत आग्रह गरेका छन् ।
