कनकाई खबर ‘ \ निजामति दिवसको अवसर पारेर झापा गाउँपालिकामा आयोजित एक विशेष कार्यक्रमका विच गाउँपालिकामा कार्यरत दुईजना कर्मचारीलाई वर्ष उत्कृष्ट कर्मचारीका रुपमा सम्मान गरिएको छ । 
यसरी सम्मानित हुने गाउँपालिकाका कर्मचारीमा स्वास्थ्य शाखा प्रमुख लक्ष्मण बिक र वडानम्बर १ र २ का संयुक्त वडासचिव नारायण चौंलागाईँ रहेका छन् । सम्मानित दुवैजना कर्मचारीलाई कार्यक्रममा प्रमुख अतिथि गाउँपालिकाका अध्यक्ष जयनारायण शाह र विशिष्ट अतिथि गाउँपालिका उपाध्यक्ष कुन्तीदेवी वुडाथोकीबाट सम्मान पत्रका साथ नगदसहित दोसल्ला ओढाएर विशेष सम्मान गरिएको छ ।
गाउँपालिकाका प्रमुख प्रशासकीय अधिकृत जीवन निरौलाको सभापतित्वमा सम्पन्न कार्यक्रममा प्रमुख अतिथिका रुपमा रहेका गाउँपालिका अध्यक्ष शाहले जुनसुकै कार्यालय वा संस्थाहरुमा समेत सम्बन्धित निकायवाट कामको मूल्यांकन गर्ने बानीको विकास भएमा कर्मचारीहरुमा समेत कामप्रति उत्साह जाग्ने बताएका छन् । झापा गाउँपालिकामा अहिले सम्मकै इतिहासमा कर्मचारीहरुका तर्फवाट यस किसिमको पहिलो कार्यक्रम सम्पन्न भएको भन्दै गाउँपालिका अध्यक्ष शाहले खुशी व्यक्त गरेका छन् ।
कार्यक्रममा विशिष्ट अतिथी गाउँपालिका उपाध्यक्ष कुन्तीदेवी बुढाथोकीले कामको उचित मूल्यांकन गरेर कर्मचारीहरुलाई सम्मान गर्ने परिपाटीले कामप्रति थप हौसला मिल्ने बताएकी छन् । झापा गाउँपालिकामा सुरुवात भएको यस किसिमको कार्यले सुशासनमा थप सहयोग पुग्नेमा आँफू विश्वस्त रहेको उपाध्यक्ष बुढाथोकीले बताएकी छन् ।
