कनकाई खबर \ कोरोना संक्रमणबाट मृत्यु भएकी सुरुङ्गाकी ४५ वर्षिय महिलाको शवलाई झापा चारआलीस्थित नयाँ श्रीनाथ गणका सेनाको टोलीले अन्तिम सलामी दिई आइतवार साँझ दाहसंस्कार गरेका छन् ।
मृतक महिलाको शवलाई परिवारका सदस्य, आफन्तजनका साथमा स्थानीय कनकाई सामुदायिक वन उपभोक्ता समुहको वन क्षेत्रमा दाहसंस्कार गरिएको हो ।
नगर क्षेत्र भित्र कसैको कोरोना संक्रमणका कारण मृत्यु भएमा कनकाई सामुदायिक वन क्षेत्रको निश्चित स्थानमा दाह संस्कार गर्ने यस अघि नै भएको कनकाई नगरपालिकाको निर्णयअनुसार सोही वन क्षेत्रमा दाह संस्कार गरिएको बताइएको छ ।
कनकाई नगर क्षेत्रमा आज (सोमवार) थप १३ जनामा कोरोना संक्रमण देखिएको छ । संक्रमित सबै स्थानीय समुदायकै रहेको कनकाई नगरपालिका स्वास्थ्य शाखाले जनाएको छ । गत भदौ १६ गते लिइएको ९८ जनाको स्वांवबाट १३ जनामा कोरोना फेला परेको हो । जसमा कनकाई ३ मा ५ जना महिलासहित ९ जना र ७ मा एक महिलासहित ४ जनामा कोरोना संक्रमण पुष्टि भएको हो । कनकाई ३ मा केहिदिन अघि कनकाई नगरपालिकाको डाटा संकलनमा काम गर्ने एक महिला कर्मचारीमा कोरोना पुष्टि भएपछि गरिएको उनको घर तथा गाउँमा थप परिक्षण गर्दा ९ जनामा कोरोना पुष्टि भएको स्वास्थ्य शाखाले जनाएको छ ।
यता कनकाई ७ मा कनकाई नगरपालिकाका एक जना सवारी चालक र वाँकी उनकै छिमेकीहरुमा कोरोना पुष्टि भएको हो । कनकाई नगरपालिकामा योसँगै कोरोना संक्रमितको संख्या ४७ जना पुगेको छ भने एक जना संक्रमितको मृत्यु भइसकेको छ । कनकाई नगरपालिकाको हिजो थप ४५ जनाको पिसिआर परिक्षणकालागि स्वाव संकलन गरिएको बताइएको छ ।
