कनकाई खबर \ झापा गाउँपालिका वार्ड नम्बर ५ र ६ का पूर्व वड़ा सचिब जयराम ताम्लीको सम्मानजनक बिदाइ भएको छ ।
दुवै वड़ा कार्यालयद्वारा संयुक्त रुपमा आयोजित एक कार्यक्रमका बीच शुक्रवार पूर्व सचिब ताम्लीको विदाइ तथा सम्मान कार्यक्रम भएको हो । वड़ा नम्बर ६ का वड़ा अध्यक्ष हरीबहादुर बानीयाँको सभापतित्व तथा वड़ा नम्बर ५ का वड़ा अध्यक्ष दिनेशप्रसाद राजवंशीको प्रमुख आतिथ्यमा भएको कार्यक्रमलाई वड़ा सचिब पूर्ण चन्द्र मैनालीले संचालन गरेका थिए । वि.सं. २०५२ सालदेखी साबिक शरणामती गाबिसको कार्यालयमा नियुक्ति भई सेवा प्रवेश गरेका ताम्लीले बिगत २४ वर्षदेखी सार्वजनिक सेवा प्रवाहमा उच्चकोटीको कार्य गर्दै आएको बताइएको छ ।
कार्यक्रममा बोल्दै वड़ाका जनप्रतिनिधिहरु मोहन पोखरेल, कुमार ओली, हेमा राई, विजय राजवंशी, स्थानीय शंकर पाण्डे तथा झापा गाउँपालिका वड़ा नम्बर ७ का वड़ा सचिब युवराज दाहालले सम्मानित पूर्व वड़ा सचिब ताम्लीको कार्यकाल उदाहरणीय रहेको बताए । त्यस्तै कार्यक्रमको प्रमुख अतिथीका रुपमा रहेका वड़ा नम्बर ५ का वड़ा अध्यक्ष दिनेशप्रसाद राजवंशी साथै वड़ा नम्बर ६ का वड़ा अध्यक्ष हरीबहादुर बानियाँले समेत ताम्लीले यस क्षेत्रमा लामो समयदेखी सेवा गरेर स्थानीय स्तरमा महत्वपूर्ण योगदान गरेको बताए । कार्यक्रममा सहभागीहरुले ताम्लीको अवकाश पछीको जीवन सुखद र फलदायी रहोस् भन्ने कामना व्यक्त गरेका थिए ।
यसै अवसरमा झापा गाउंँपालिका वड़ा नम्बर ५ र ६ का नव नियुक्त वड़ा सचिब पूर्ण चन्द्र मैनालीलाई वड़ामा स्वागत गर्दै मैनालीको कार्यकालको सफलताको शुभकामना व्यक्त गरिएको थियो । कार्यक्रममा शरणामतीका स्थानीयवासी, जेष्ठ नागरिक, सुरक्षाकर्मी लगायतको उपस्थिति रहेको बताइएको छ ।
