कनकाई खबर / झापाको कनकाईमा आज शुक्रबार दुई महिलासहित १० जनामा थप कोरोना पुष्टी भएको छ ।
कोरोना संक्रमण पुष्टी हुनेमा महिला तर्फ कनकाई ३ की २० वर्षीय र कनकाई १ की ३६ वर्षीेय महिला रहेका छन् । दुई जना महिलामध्ये वडा नं. ३ की महिला सम्बन्धित वडाको डाटा संकलन गर्ने कर्मचारी परिवारकी सदस्य हुन् भने अर्की महिला नेपाल बहुउद्येश्यी सहकारी संस्था (एनएमसी) शाखा सुरुङ्गामा कार्यरत एक कर्मचारी हुन् । त्यस्तै अन्य आठजना पुरुषहरु कनकाई ५ का राजनीति कार्यकर्ता, समाजसेवी, व्यवसायी रहेको नगर स्वास्थ्य शाखाका प्रतिनिधी नारायण अधिकारीले बताएका छन् ।
समुदायस्तरमा कोरोना फैलिन थालेपछि कनकाई नगरपालिकाले कन्ट्रयाक ट्रेसिङ् र स्वब संकलन गर्ने कार्यलाई तिब्रता दिँदै पाँच दिन अघि भदौ १५ गते ६२ जनाको स्वब संकलन गरेर पिसिआर परिक्षणकालागि प्रदेश ल्याब विराटनगर पठाएको थियो । जस मध्ये १० जनाको रिपोर्ट पोजेटिभ आएको बताइएको छ । यो संगै कनकाईमा हाल सम्म कुल संक्रमितको संख्या ३२ जना पुगेका छन् भने १४ जना डिस्चार्ज भएका छन् । आइसोलेशनमा ५ जना र होम आइसोलेशनमा १३ जना रहेको नगर स्वास्थ्य शाखाका प्रतिनिधी नारायण अधिकारीले जानकारी दिएका छन् ।
केही दिन अघि मात्र नगरको वडा नं.१, ७ र ३ का गरी आठजना नगरबासीको कोरोना पुष्टी भएसँगै नगरपालिकाले थप कडाई गर्दै अनिश्चितकालकालागि नगर क्षेत्रमा बन्दा बन्दी गरेको छ । योसँगै झापामा आज सुक्रबार मात्र २६ जनामा कोरोना संक्रमण पुष्टि भएको छ । पछिल्लो २४ घन्टामा थप २६ जनामा कोरोना पुष्टि भएको स्वास्थ्य कार्यालय झापाले जनाएको छ ।
स्वास्थ्य कार्यालय झापाका फोकल पर्सन जीवन चौंलागाईंका अनुसार संक्रमितहरु मेचीनगर नगरपालिका वडा नं. ७ र १० का ४ पुरूष, झापा गाउँपालिकाका वडा नंं. १ का ३ जना पुरुष, गौरीगन्ज गाउँपालिका वडा नं. ५ का १ जना पुरुष, दमक नगरपालिका वडा नं. ६, ७ र ८ का ३ महिला र २ जना पुरुष, भद्रपुर नगरपालिकाका २ जना प्रहरी र कचनकवल गाउँपालिका वडा नं. ७ का १ पुरुष रहेका छन् ।
जसमा ७ महिला र १९ जना पुरुष रहेको बताइएको छ । झापा गाउँपालिका र कचनकवलका संक्रमितहरु भारतबाट आएका हुन् भने अन्य सबै जना स्थानीय बासिन्दा रहेको चौलागाईंले बताए । यो संगै झापामा कुल संक्रमितको संख्या ६४१ पुगेको छ र ४८१ जना डिस्चार्ज भएको बताइएको छ ।
