शिवसताक्षी / शिवसताक्षी नगरपालिकाले नगर क्षेत्रमा जारी लडाउनलाई निरन्तरता दिने भएको छ ।
सोमबार बसेको नगरपालिकाको बोर्ड बैठकले जारी लकडाउन अर्को निर्णय नहुन्जेलसम्मकालागि रहने निर्णय गरेको हो । भदौ ८ गतेको कार्यपालिका बोर्ड बैठकले एक सातासम्मका लागि आंशिक लकडाउन गर्ने निर्णय गरेको थियो । छिमेकी पालिकाको कमल र झापा गाउँपालिकामा पछिल्लो पटक संक्रमितको संख्या थपिएपछि शिवसताक्षीमा लकडाउन अर्को निर्णय नहुन्जेलसम्म लागि यथावत हुने बोर्ड बैठकमा सहभागी एक वडा अध्यक्षले बताए ।
उनले भने, ‘कार्यपालिकाको व्ययभार नियन्त्रणका लागि शिवसताक्षी नगरको लकडाउन अवधि अर्को निर्णय नहुन्जेलसम्मका लागि लम्बिएको हो ।’ अन्य निर्णय यथावतकै रहने पनि उनले बताए ।
यसअघि दुधे , झिलझिले, डुडामारी, धरमपुर, शिवगञ्ज, बोलोचोक, जनता बजार , रगियाथान लगायतका बजारमा रहेका होटल, ब्युटिपार्लर र शैलुन बन्द गर्ने निर्णय भएको थियो। भदौ १५ गतेसम्म साविकको निर्णयलाई बिहान ८ बजेदेखि दिउँसो १२ बजेसम्म मात्र होटल, ब्युटिपार्लर र शैलुन बाहेकका पसल खोल्न दिने निर्णय भएको शिवसताक्षी नगरपालिकाका सहायक सूचना अधिकृत डिल्ली नेपालले बताए ।
नगरको धार्मिक सताक्षीधाम र दोमुखा क्षेत्रमा लगाइएको निषेधाज्ञा कायमै रहेको शिवसताक्षी नगरपालिकाको सूचना शाखाले जनाएको छ । साप्ताहिक हाट बजारलाई पनि अर्को सूचना नहुञ्जेलसम्मकालागि बन्द गरिएको नगरपालिकाले जनाएको छ ।
नगरभित्र रहेका कृषि र औषधि पसल भने खुल्ला हुनेछन् । शिवसताक्षी नगर का भित्री सडकमा सवारी साधन संचालनमा पूर्ण निषेध गरिएको छ । बैठकले नगरभित्र सभा, समारोह, तालिम, गोष्ठी गर्न समेत प्रतिबन्धको निर्णय यथावत् रहेको साहायक सूचना अधिकारी नेपालले बताएका छन् ।
