कनकाई खबर / कनकाई नगरपालिकाको दुर्गापुर बजार साथै यसको आसपासका गरी आठ जना स्थानीयबासीमा कोरोना पोजेटिभ देखिएपछि समुदायमा कोरोना फैलिएको भन्दै कनकाई नगर क्षेत्रका अतिआवश्यक सेवा बाहेक अन्य सबै सेवा अर्को सुचना नआउँन्जेल सम्मलाई बन्द गर्ने निर्णय गरिएको छ ।
आइतबार नगरपालिकामा बसेको स्थानीय सरोकारवालासहितको कार्यपालिकाको आकस्मिक बैठकले आवश्यक स्वास्थ्य सुरक्षाकालागि पहिलो चरणमा नगर क्षेत्रमा लोक मार्गको एक किलो मिटर उत्तर र दक्षिण क्षेत्र सम्म निषेधाज्ञा जारी गर्न जिल्ला प्रशासन कार्यालय झापामा सिफारीसकालागि अनुरोध गर्ने समेत निर्णय भएको कनकाई नगरपालिकाका प्रमुख राजेन्द्र पोखरेलले बताएका छन् ।
यस अघि कनकाई नगरपालिका वडा नं.७ स्थित दुर्गापुर बजारमा औषधी व्यवसाय संचालन गर्दै आएका ४० वर्षिय एक पुरुषलाई कोरोना संक्रमण पुष्टी भएपछि समुदायमा कोरोना फैलिएको आशंका गर्दै दुर्गापुर बजार क्षेत्रका मात्र अतिआवश्यक सेवा बाहेक अन्य सबै सेवा बन्द गरीएको थियो । त्यसपछि सम्बन्धित व्यक्तिको सम्पर्कमा रहेका परिवारका सदस्यसहित आसपासका अन्य गरी ७७ जना स्थानीयबासीको चार दिन अघि मात्र पिसिआर परिक्षणकालागि स्वब संकलन गरिएको थियो । संकलन गरिएका मध्ये कनकाई १ निबासी नीज ४० वर्षिय पुरुषकै ९ वर्षीय एक बालक, उनकै घरमा कोठा भाडामा लिएर बस्दै आएका एक परिवारका ४१ वर्षीय पुरुष, ३६ बर्षीय महिला र १० वर्षको बालकको रिपोर्ट पोजेटिभ आएको कनकाई नगरपालिकाका प्रमुख प्रशासकीय अधिकृत रुद्रप्रसाद न्यौपानेले बताएका छन् ।
त्यस्तै कनकाई नगर वडा नं.७ का क्रमशः ३५, ३३ र १९ वर्षका तीनजना पुरुष साथै कनकाई ३ की २२ वर्षीय एक महिलाको रिपोर्ट पोजेटिभ आएको बताइएको छ ।
आजसम्म झापामा कुल संक्रमितको संख्या ५७६ पुगेको छ । जसमा भद्रपुरमा ३३, मेचीनगर १०७, बिर्तामोड १८, कनकाई २२, अर्जुनधारा २२, दमक ९५, गौरादह १९, शिवसताक्षी १२, बुद्धशान्ति १७, हल्दिवारी १३, कचनकवल १३९, कमल १८, बाह्रदशी २१, गौरीगञ्ज २८ र झापाका १२ जना रहेको बताइएको छ ।
