राम निरौला,
कनकाई खबर / झापाको कनकाई नगर क्षेत्रलाई शिक्षाको हब बनाउँने योजनाका साथ अघि बढेको कनकाई नगरपालिकाले नगर क्षेत्रमा रहेका १४ वटा सामुदायिक विद्यालय र ४ वटा बालबिकास केन्द्रलाई २४ लाख बराबरका बालशिक्षा शैक्षिक सामाग्री वितरण गरेको छ ।
कनकाई नगरपालिका र सहारा नेपालको साझेदारीमा भएको सम्झौता अनुसार नगर क्षेत्रका सामुदायिक विद्यालयहरुलाई शैक्षिक सामाग्री वितरण गरिएको हो । कनकाई नगरपालिकाका प्रमुख राजेन्द्र पोखरेलको सभापतित्वमा एक संक्षिप्त कार्यक्रमको आयोजना गरी सम्बन्धित विद्यालयका प्रधानाध्यापक साथै व्यवस्थापन समितिका जिम्मेवार पदाधिकारीहरुलाई शैक्षिक सामाग्री बितरण गरिएको बताइएको छ ।
शैक्षिक सामाग्री बितरण गर्दै कनकाई नगरप्रमुख राजेन्द्र पोखरेलले शिक्षा क्षेत्रको भौतिक साथै शैक्षिक गुणस्तर वृद्धि गर्ने कार्यलाई कनकाई नगरपालिकाले पहिलो प्राथमिक्तामा राख्दै नगर क्षेत्रलाई शैक्षिक गन्तव्यका रुपमा पहिचान स्थापित गर्ने बताएका छन् । आफ्नो उद्येश्य प्राप्तीकालागि कनकाई नगरपालिकाले सोही अनुरुपको पाठ्यक्रमको समेत तयारी गरीसकेको नगर प्रमुख पोखरेलले जानकारी दिएका छन् । कनकाई नगरको शैक्षिक साथै यहाँको चौतर्फी विकासमा सहारा नेपाल सहकारी संस्थासँगको सहकार्यले थप रचनात्मक कार्य गर्न सहयोग पुगेको भन्दै नगर प्रमुख पोखरेलले सहारा नेपाल सहकारी संस्थालाई विशेष धन्यबाद ज्ञापन गरेका छन् ।
नगर क्षेत्रका प्रत्येक सामुदायिक विद्यालयलाई १ लाख ५० हजार बराबरका साथै नगरका ४ वटा बालबिकास केन्द्रलाई प्रति विद्यालय ७५ हजार बराबरका शैक्षिक सामाग्री वितरण गरिएको कनकाई नगरपालिकाका शिक्षा प्रमुख पिताम्बर गौतमले बताएका छन् । बालबालिकाकालागि अति आवश्यक पर्ने शैक्षिक सामाग्रीबाट हरेक बालबालिकाको चौतर्फी बिकासमा भरपूर सहयोग पुग्ने अपेक्षा गरिएको नगर शिक्षा प्रमुख गौतमले बताए । कनकाई नगरपालिकाले यसै शैक्षिक सत्रदेखि कनकाई नगर क्षेत्रका सबै विद्यालयमा कक्षा एक र कक्षा ६ मा लागु हुने गरी ‘कनकाई ज्ञानमाला’ नामक नयाँ पाठ्यपुस्तक समाबेश गर्ने गरी सबै विद्यालयलाई हस्तान्तरण गरेको बताइएको छ ।
शैक्षिक सामाग्री हस्तान्तरण कार्यक्रममा नगर उपप्रमुख मन्जु प्रसाई, कनकाई नगरपालिका वडा नं.२ का वडाअध्यक्ष परशुराम गिरी, सहारा नेपालका मूल समिति सदस्य एवम् साझेदारी कार्यक्रमका सहसंयोजक पदमलाल भट्टराई लगायतले सामुदायिक विद्यालयको शैक्षिक स्तर वृद्धिकालागि वालवालिकाहरुलाई मनोरञ्जन गर्दै शिक्षा आर्जन गर्न सक्ने वातावरण बनाउँन शैक्षिक सामाग्रीले थप सहयोग पुग्ने बताएका छन् । कार्यक्रममा नौ वटै वडाका वडाअध्यक्ष, कार्यपालिका सदस्य साथै अन्य जनप्रतिनिधीहरु, सहारा नेपालका संचालक समितिका उपाध्यक्ष उपेन्द्र ओली, सुरुङ्गा सेवा केन्द्रका सहयोग उपसमितिका सदस्य विनोद थपलिया र होम बिमली, सुरुङ्गा सेवा केन्द्रकी प्रमुख गोमा बस्नेत, शिवगन्ज सेवा केन्द्र प्रमुख टिकाबहादुर प्रधानलगायत सम्बन्धित विद्यालयका प्रधानाध्यापक, व्यवस्थापन समितिका पदाधिकारीहरु सहितको उपस्थिती रहेको थियो । कार्यक्रमको संचालन शिक्षा शाखाका प्रतिनिधी मेदनी पाठकले गरेका थिए ।
