कनकाई खबर \ राष्ट्रिय समाचार समिति मेची अञ्चल पूर्वप्रमुख , साहित्यकार एवम् नेपाल पत्रकार महासंधका सदस्य अमृतलाल श्रेष्ठको आइतबार अपरान्ह निधन भएको छ ।
दुवै मिर्गौलाले काम गर्न छाडेपछि श्रेष्ठ लामो समयदेखि उपचाररत थिए । झापाको धुलावारी निवासी पत्रकार श्रेष्ठको आइतवार अपरान्ह पौने ६ बजे मेचीनगर १० निजी निवासमा निधन भएको हो । पारिवारिक स्रोतका अनुसार एक साता अघि गम्भीर विरामी भए पछि श्रेष्ठलाई उपचारकालागि विर्तामोडको विर्तासिटी हस्पिटलमा भर्ना गरिएको थियो ।
हस्पिटलबाट आज ( साउन २५ गते) घर पुर्याएको केही घण्टमामै उनको निधन भएको बताइएको छ । जीवनमा थुप्रै साहित्यिक रचना प्रकाशित गरिसकेका श्रेष्ठका पत्नी निलु श्रेष्ठ , दुई छोरा अनिमेष , अनिशेष श्रेष्ठ र एक छोरी अनिसा श्रेष्ठ छन् ।
धुलावारी जेसीजका पूर्व अध्यक्ष लगायत विभिन्न संघ संस्थामा समेत क्रियाशिल ६४ वर्षीय श्रेष्ठ यस अघि नेवा पत्रकार राष्ट्रिय दबू केन्द्रीय कार्यसमिति लगायत विभिन्न संघ संस्थाबाट सम्मानित तथा पुरस्कृत भइसकेका छन् ।
