सुरुङ्गा \ कनकाई बहुमुखी क्याम्पस सुरुङ्गाका सहायक क्याम्पस प्रमुख सहप्राध्यापक कुलेन्द्र मैनालीको निधन भएको छ ।
लामो समयदेखि मधुमेह रोगबाट पीडित मैनालीको बिराटनगरस्थित नोबेल मेडिकल कलेज एण्ड रिसर्च सेन्टरमा मंगलबार बिहान निधन भएको हो । ५७ वर्षीय मैनालीको हृदयाघातबाट निधन भएको अस्पताल स्रोतलाई उध्दृत गर्दैै उनका सहोदर भाइ भूपिचन मैनालीले जानकारी दिए । मैनाली २०५३ सालदेखि कनकाई क्याम्पस सुरुङ्गामा अर्थशास्त्र विषय प्राध्यापन गर्दै आएका थिए ।
उनी हरिकुल नमुना माविका पूर्व प्राचार्य, मैनाली समाज झापाका सहसचिव लगायतका भूमिकामा रही शैक्षिक तथा सामाजिक क्षेत्रमा क्रियाशील थिए । उनले ८ वर्षदेखि सुरुङ्गामा निजी लगानीमा दुर्गा प्रिन्टिङ प्रेस सञ्चालन गर्दै आएका थिए । उनले विभिन्न पुस्तक तथा साहित्यिक पत्रिकाहरुको सम्पादन पनि गरेका थिए । उनको निधनबाट कनकाई नगरले समर्पित शिक्षाकर्मी, कुशल सम्पादक र मिलनसार व्यक्तित्व गुमाएको कनकाई बहुमुखी क्याम्पस सुरुङ्गाका उपप्राध्यापक तीर्थराज खरेलले बताए । स्वर्गीय मैनालीका आमा, श्रीमती अनुषा, छोरी कृतिका, छोरा नविन, ६ भाइहरु र ७ बहिनीहरु रहेका छन् ।
