राम निरौला,
कनकाई खबर / झापाको कनकाई–४ कोटीहोमस्थित समर्पण राष्ट्रिय अभियानको भवनबाट संचालनको तयारीमा रहेको पिसिआर परीक्षण प्रयोगशालाकालागि अन्तर्राष्ट्रिय झापाली समाजले २५ लाख रुपैयाँको चेक हस्तान्तरण गरेको छ ।
एकका लागि एक अभियानको अगुवाईमा समुदाय–सहकारी–सरकार र निजी क्षेत्र पनि संगै रहेकोे अभियानमा मुख्य साझेदार संस्था मध्येको एक अन्तर्राष्ट्रिय झापाली समाजले सोमबार बिर्तामोडस्थित अतिथि सदनमा आयोजित एक विशेष कार्यक्रममा सहयोग रकम अभियानलाई हस्तान्तरण गरेको हो ।
सहयोग रकम हस्तान्तरण गर्दै अन्तर्राष्ट्रिय झापाली समाजका उपाध्यक्ष नविन पोखरेलले अभियानको साझेदार संस्थाका रुपमा मानवीय सेवामा सहभागी हुने अवसर पाउँदा धेरै उत्साह जागेको बताएका छन् । कार्यक्रमको अध्यक्षता गरिरहेका समाजका उपाध्यक्ष पोखरेलले मुलुकको समृद्धिकालागि स्वास्थ्य सेवाको समेत महत्वपूर्ण भूमिका रहने हुँदा अभियानले अघि सारेको कार्यक्रम नागरिक र सरकारकोलागि अत्यन्तै आवश्यक रहेको बताएका छन् । समाजले विश्वका ४२ वटा देशमा आफ्नोे शाखा विस्तार गरेर सामाजिक क्षेत्रमा मानवीय सेवाका कार्यहरु गर्दै आएको बताइएको छ ।
अन्तर्राष्ट्रिय झापाली समाजका कार्यालय सचिव मणिकुमार लिम्बूको स्वागत तथा अभियानका सदस्य नेपाल पत्रकार महासंघ झापाका उपाध्यक्ष एकराज गिरीको संचालन रहेको कार्यक्रममा अभियानका संयोजक महेन्द्रकुमार गिरीले कोरोना भाइरसको संक्रमण तथा नियन्त्रणमा सरकारलाई सहयोग पुर्याउन नागरिकस्तरबाट पीसीआर परीक्षण प्रयोगशाला स्थापना गरी सरकारलाई हस्तान्तरण गर्न लागिएको जानकारी दिएका छन् । मेची अञ्चल अस्पतालको मातहतमा रहने गरी कनकाई–४ कोटीहोमस्थित समर्पण राष्ट्रिय अभियानको भवनमा पिसि आर परीक्षण प्रयोगशाला सञ्चालन हुने बताउँदै संयोजक गिरीले हालसम्म एक करोड ६८ लाख रुपैयाँ संकलन भइसकेको र ४७ लाख रुपैयाँ खाद्यान्न, भिटिएम, आरडिटीलगायतमा खर्च भएको बताएका छन् ।
अभियानका सहसंयोजक विनोद बस्नेत, सदस्य शिव कडेल, नेपाल पत्रकार महासंघका पूर्व केन्द्रिय सदस्य मोहनकाजी न्यौपाने लगायतले समुदाय–सहकारी–सरकार र निजी क्षेत्रले समेत कनकाईमा पिसिआर ल्याब संचालनकालागि ऐक्यबद्धता जनाइरहेको बर्तमान अवस्थामा नागरिकको स्वास्थ्य सुरक्षाकालागि राज्यले आफ्नो दायित्व सम्झेर गम्भिर हुनु पर्नेमा जोड दिएका छन् । व्यक्तिगत स्वार्थका पछि नलागिकन समुदायको हितकालागि एकताका साथ अघि बढ्न सरोकारवाला सबैलाई सहभागी बक्ताहरुले जोड दिएका छन् । यदि सरकारले आवश्यक्ता ठहराउँछ भने कनकाई नगरमा मात्र नभई अन्य ठाउँमा समेत अभियानका तर्फवाट पिसिआर ल्याब अथवा कोरोना अस्पताल संचालन गर्न एकका लागि एक अभियान तयार रहेको भन्दै कनकाई ४ स्थित समर्पण राष्ट्रिय अभियानको भवनमा पिसि आर परीक्षण प्रयोगशाला चाँडै सञ्चालनमा आउँने बताइएको छ ।
