राम निरौला,
कनकाई खबर / झापाको विर्तामोड— २ स्थित चारपानेमा केन्द्रिय कार्यालय स्थापना गरी वित्तिय कारोबार गर्दै आएको सहारा नेपाल बचत तथा ऋण सहकारी संस्था लि. ले लकडाउन अवधिको ३ करोड ४५ लाख रुपैंयाँ ब्याज मिनाहा गरेको छ ।
प्रदेश नं.१ का ६ वटा जिल्लामा आफ्नो सेवा विस्तार गरेर वित्तिय सेवा प्रदान गर्दै आएको सहाराले कोरोना भाइरसको महामारीका कारण मुलुकभर लकडाउन भएको अवधि चैत महिनादेखि २०७७ असार मसान्त सम्म चार महिनामा संस्थाले गरेको लगानीको व्याजमा १० प्रतिशत छुट गर्दै सो बराबरको कुल रकम ३ करोड ४५ लाख ब्याज मिनाहा गरेको संस्थाका सचिब महेन्द्रकुमार गिरीले एक विज्ञप्ती जारी गर्दै जानकारी दिएका छन् । यस अवधिमा बचत र ऋण कुनैमा पनि हर्जना, जरिवाना नलिएको साथै ऋणको किस्ता पनि स्वेच्छिक रुपमा तीर्न सक्ने गरी व्यवस्था मिलाएको विज्ञप्ती मार्फत संस्थाका सचिव गिरीले जानकारी दिएका छन् ।
लकडाउनको असहज परिस्थितीमा समेत सहारा नेपाल(साकोस) ले आफ्नो सेवा क्षेत्रमा रहेका सदस्य तथा समुदायमा थोरै भएपनि सहयोग पुगोस् भनेर स्वास्थ्य चेतना, खाद्यन्न सामाग्री, विपद सापटी र आत्मनिर्भरताकोलागि कृषि प्याकेज उपलव्ध गराएको बताइएको छ । साकोसका कर्मचारी साथै स्थानीय सहयोग समितिका पदाधिकारीहरु सेवा क्षेत्रका क्वारेन्टाइन स्थलमा नै गएर स्थानीय सरकार मार्फत खाद्य सामाग्री वितरणमा सक्रियता देखाएको वताइएको छ ।
