झापा \ झापाको सुरुङ्गाबाट भारु नक्कली नोट सहित तीन जनालाई प्रहरीले शनिबार पक्राउ गरेको छ ।
पक्राउ पर्नेमा झापा कनकाई नगरपालिका–४ का ३० वर्षीय खुसिल मियाँ, झापा गाउँपालिका–५, पन्थपाडाका २४ वर्षीय एराजुल मियाँ र कनकाई नगरपालिका ३ सुरुङ्गाका सुनचाँदी व्यवसायी मौसम श्रेष्ठलाई प्रहरीले अनुसन्धानका लागि नियन्त्रणमा लिएको हो ।
उनीहरुलाई भारतीय पाँच सय दरका नक्कली एक लाख ४० हजार रुपैंयाँसहित पक्राउ गरेको हो । कनकाई नगरपालिकाका–४ का खुसिल मियाँले उक्त रकम सुनचाँदी व्यवसायी श्रेष्ठलाई बैंकले भारु पैसा लिन मानेन भन्दै नेपाली रुपैंयाँ साटेका थिए । श्रेष्ठले अर्का व्यावसायीलाई उक्त नक्कली रकम दिएको प्रहरीले बताएको छ । ती व्यक्तिले भारु पैसा लिएर बिमा रकमको भुक्तानी दिन जाँदा उक्त रकम नक्कली भएको खुलेको बताइएको छ ।
खुसिल मियाँले उक्त रकम झापा गाउँपालिका बस्ने एराजुल मियाँबाट लिएको भनेपछि प्रहरीले उनलाई समेत शनिबार साँझ आफ्नै घरबाट पक्राउ गरेको हो । उनीहरुलाई आज म्याद थप गरेर इप्रका बिर्तामोडमा पत्रकार सम्मेलन गरी सार्वजनिक गरेको हो । प्रहरीले नक्कली नोटको कारोबारीकालागि थप अनुसन्धान गरिरहेको इलाका प्रहरी कार्यालय बिर्तामोडका प्रमुख डिएसपी मुकुन्द रिजालले जानकारी दिएका छन ।
पछिल्लो समय एकै स्थानबाट नेपाल भारत सीमा क्षेत्रमै घर भएका नागरिकबाट ठूलो परिमाणको भारतीय नक्कली नोट फेला पर्नुमा भारतीय गिरोह नक्कली नोटको कारोबारमा सम्लग्न भएको आशंका गरिएको छ ।
