राम निरौला,
कनकाई खबर / व्यवसायीहरुमा एकता कायम गर्दै निजी क्षेत्रको संरक्षण साथै व्यवसायको प्रवद्र्धन गर्नकालागि आवश्यक कार्ययोजनाका साथ अघि बढ्ने उद्येश्यले झापाको कनकाई नगरमा नगरस्तरीय चेम्बर अफ कमर्श गठन गरिएको छ ।
नगरको प्रारम्भिक समितिका रुपमा रहेको कनकाई चेम्बर अफ कमर्शको अध्यक्षमा सुरुङ्गा बजारका पुराना व्यवसायी सामाजिक अभियन्ता मिनाल तिम्सिना सर्वसम्मत रुपमा चयन हुनुभएको छ । व्यवसायका क्षेत्रमा सक्रिय रहे पनि विभिन्न सामाजिक गतिविधीमा अग्रस्थानमा रहेका व्यक्तित्वहरुबाट गठन भएको व्यवसायीहरुको संस्था चेम्बर अफ कमर्श कनकाईको वरिष्ठ उपाध्यक्षमा जनक कार्की चयन हुनुभएको छ । त्यस्तै उपाध्यक्षद्वयमा अनिल गोयल र खीनमाया खतिवडा, महासचिवमा पदम ओली, सचिवद्वयमा केशब शिवाकोटी र अनिता मैनाली उप्रेती, कोषाध्यक्ष विश्वविजय खरेल चयन हुनुभएको छ । त्यस्तै सदस्यहरुमा राधिका ओली, मोतिखर ओझा, दिनानाथ खतिवडा, टंक पाठक, लिला तिम्सिना, गोविन्द सुवेदी र निर्मला चाम्लीङ् राई रहनुभएको छ ।
चेम्बर अफ कमर्श कनकाई नगर समितिको घोषणा कार्यक्रम चेम्बरका झापा अध्यक्ष ओमकृष्ण विमलीलको सभापतित्वमा सम्पन्न भएको हो । कार्यक्रमको प्रमुख अतिथीका रुपमा रहनुभएका चेम्बरका केन्द्रिय सदस्य एवम् १ नं.प्रदेशका संयोजक राजेन्द्र घिमिरेले मुलुकलाई समृद्धिको बाटो तर्फ लगाउँनकालागि रोजगारीको अवसर खोजिनु पर्नेमा जोड दिनुभएको छ ।
कोरोनाका कारण विश्व आक्रान्त भएको वर्तमान अवस्थामा विदेशबाट स्वदेश तर्फ आएका नेपाली युवाहरुलाई उद्यमशिल बनाउँने कार्यमा चेम्बरको भूमिका महत्वपूर्ण हुने कुरामा घिमिरेले जोड दिनुभएको छ । महिला चेम्बर झापाकी अध्यक्ष प्रेमा भट्टराईको स्वागत तथा चेम्बर झापाका सचिव बिरोध सुवेदीले संचालन गर्नुभएको कार्यक्रमलाई झापा क्षेत्र नं.४, (ख) का प्रदेश सभा सदस्य हिराकुमार थापा, कनकाई नगरकापालिकाका प्रमुख राजेन्द्र पोखरेलले व्यवसायीहरुको आवश्यक्ता र अवस्थालाई मध्यनजर गर्दै सरकारका तर्फवाट समेत आवश्यक सहयोग गर्ने प्रतिवद्धता जनाउँनुभएको छ ।
