झापा । संस्थागत विद्यालय शिक्षक युनियन (इस्टु) झापाले सामाजिक न्यायका लागि असार १९ गते बिर्तामोडमा वृहत प्रदर्शन गर्ने तयारी गरेको छ । संस्थागत विद्यालयमा कार्यरत शिक्षक कर्मचारीले काम गरिसकेको समयको तलब पाउन नसकेको, सरकारले समेत सुरक्षाका लागि पहल नगरेको प्रति आक्रोस पोख्दै इस्टु सामाजिक न्यायको माग राखी सडक आन्दोलनमा उत्रेको हो ।
वौद्धिक श्रमिकका रूपमा रहेका संस्थागत विद्यालयका शिक्षक, कर्मचारी, चालक, सहचालक लगायतलाई काम लगाउने अधिकांशले काम गरिसकेको समयको पारिश्रमिक नदिँदा गाँस जुटाउन समस्या उत्पन्न भएको छ । यस कार्यले सामाजिक न्याय र बाँच्न पाउने अधिकारसमेतको अपहरण भएपछि अपमान बोध गर्दै शिक्षक कर्मचारी सडकमा आउन बाध्य भएका हुन् ।
आन्दोलन परिचालन समिति झापाको नेतृत्व सम्हालिरहेका इस्टु नेपालका केन्द्रीय सदस्य बालकृष्ण दाहालका अनुसार बिर्तामोडमा हुने प्रदर्शनमा एक हजार बढी शिक्षक कर्मचारी सहभागी हुनेछन् । १५ वटा स्थानीय तह रहेको झापामा हरेकबाट कम्तीमा ५० देखि सय जनासम्म शिक्षक कर्मचारी आन्दोलनमा आउने निश्चित भइसकेको छ । शान्तिपूर्ण र सामाजिक दूरी कायम गर्दै प्रदर्शन हुने जनाइएको छ ।
संस्थागत विद्यालयमा कार्यरत शिक्षक कर्मचारीलाई काम लगाउने अधिकांश विद्यालयका सञ्चालकले बन्दाबन्दीको बहाना बनाएर शैक्षिक वर्ष २०७६ को दिनुपर्ने तलव पनि रोकिदिएपछि भोकमरी खपेर शिक्षक कर्मचारीले कष्टपूर्ण जीवनयापन गर्दै आइरहेका छन् । शिक्षक कर्मचारीका लागि तीनै तहका सरकारले पनि बेवास्ता गरेपछि बन्दाबन्दीको असरका कारण सडकमा आउनु पर्ने वातावरण निर्माण भएको छ ।
