राम निरौला,
कनकाई खबर / झापाको कनकाई नगरपालिकाले आ.ब. २०७७/0७८ को नीति तथा कार्यक्रममाथिको संशोधन प्रस्ताव बहुमतले पारित गरेको छ ।
कनकाई नगर क्षेत्रको विशेष लकडाउनका कारण असार १० गते अनलाइन प्रविधिको प्रयोग गर्दै कनकाई नगरपालिकाले सातौं नगर सभामा ५४ करोड, ४३ लाख, ५० हजार बराबरको बजेटसहित नीति तथा कार्यक्रम प्रस्तुत गरेको थियो । कोरोनाको कहरसँगै लकडाउन केही सहज भएपछि आज सोमवार नगरपालिकाले एक विशेष कार्यक्रमको आयोजना गरी प्रस्तावित नीति तथा कार्यक्रम पारित गरेको हो ।
कनकाई नगरपालिकाकी उपप्रमुख मन्जु प्रसाईँ सहित सम्पूर्ण जनप्रतिनीधिहरुको उपस्थितीमा आवश्यक स्वास्थ्य सुरक्षा अपनाउँदै संचालन गरिएको कार्यक्रममा व्यापक छलफल गर्दै संशोधन प्रस्ताव बहुमतले पारित भएको कनकाई नगरपालिकाका प्रमुख राजेन्द्र पोखरेलले बताएका छन् । नगर प्रमुख पोखरेलको सभापतित्वमा सम्पन्न कार्यक्रममा प्रत्येक वडाका जनप्रतिनिधीहरुवाट नीति तथा कार्यक्रमका बारेमा दफाबार छलफल भएको बताइएको छ ।
छलफलमा वडा नं. ६ का तर्फवाट वडाअध्यक्ष लक्ष्मी ओली, कनकाई नगर वडा नं ७ का वडाअध्यक्ष लिलाबहादुर कन्दङ्वा, वडा नंं. २ का तर्फवाट वडा सदस्य प्रताप राई, वडा नं.३ का तर्फवाट वडा सदस्य छबी थपलिया, वडा नं.४ का तर्फवाट वडा सदस्य रोशन सुवेदी, वडा नं.९ का तर्फवाट नरमान श्रेष्ठ लगायतले नीति तथा कार्यक्रमका विभिन्न दफाका बारेमा सुझाव प्रस्तुत गरेका थिए । कनकाई नगरपालिकाका प्रमुख प्रशासकीय अधिकृत रुद्रप्रसाद न्यौपानेले कार्यक्रममा उठेका सवालको टिप्पणी गर्दै आवश्यक सुझाव प्रस्तुत गरेका थिए ।
