कनकाई खबर / भारी बर्षाका कारण झापाका नदीहरुमा वहाव बढेसँगै नदी कटान हुन सुरु भएको छ । केही दिनदेखि अविरल परेको बर्षा शनिबारदेखी रोकिएसँगै नदी कटान सुरु भएको हो ।
पूर्वका पहाडी क्षेत्रमा हाल सम्म पनि विभिन्न स्थानमा बर्षा भईरहेको जल तथा मौसम विभाग पुर्वानुमान शाखाले बताएको छ । पहाडमा निरन्तर परेको पानीका कारण नदीका किनारका बगरहरु छोपिन थालेका छन । अघिल्लो वर्ष झैं यस वर्ष पनि वर्षातको सुरुवातबाटै नदीले खेती योग्य जमिन कटान गर्न थालेको छ ।
झापामा हरेक बर्ष नदीले सयौं बिघाह जमिनमा क्षती पुर्याउँदै आएको छ । त्यसमा कनकाई नदीले गर्ने क्षती धेरै हुने गरेको छ । बर्षातका कारण हाल कनकाई नगरपालिका, शिवसताक्षी र झापा गाउँपालिका आसपासका सयौं खेतीयोग्य जमिन नदी कटान हुँन थालेका छन् । झापाको कनकाई नदिमा आएको भेलबाढी रोकिएपछि यतीवेला नदी कटान सुरु हुन थालेको हो । बाढी संगैको उर्लदो भेलले जिल्लाको झापा गाउँपालिका वडा नं.७ टप्पु टोल र जनता टोलमा रहेको २२ सय ५० मिटर लामो जनताको तटबन्धनमा क्षती पुर्याएको छ ।
बाढीका कारण क्षती पुगेको जनताको तटबन्धनको समयमै संरक्षण हुन नसकेमा सो क्षेत्रका सयौं घर परिवार डुवान र कटानमा पर्ने अवस्था रहेको बताइएको छ । तटबन्धनको संरक्षण गर्न स्थानीय जनप्रतिनिधी, नेपाल प्रहरी, सशस्त्र प्रहरी र स्थानीयबासीको सहभागितामा मर्मत सम्भार भईरहेको छ । तटबन्धनमाा कनकाई माईखोलालाई आफ्नै धारमा बगाउने प्रयास भईरहेको जिल्ला प्रहरी कार्यालय झापाका प्रहरी प्रबक्ता प्रहरी नायव उपरिक्षक राकेश थापाले जानकारी दिएका छन् ।
