राम निरौला,
कनकाई खबर/ झापाको कनकाई नगरपालिकाले आज बुधवार अनलाइन प्रविधिको प्रयोग गर्दै सातौं नगर सभा सम्पन्न गरेको छ ।
सभामा कनकाई नगरपालिकाकी उपप्रमुख मन्जु प्रसाईँले ५४ करोड, ४३ लाख, ५० हजार बराबरको बजेट प्रस्तुत गर्दै वार्षिक नीति तथा कार्यक्रम सार्वजनिक गरेकी छिन् । कनकाई नगरपालिकाको कार्यालयबाट नगर प्रमुख राजेन्द्र पोखरेल, प्रमुख प्रशासकीय अधिकृत रुद्र न्यौपाने सहित केही वडाका जनप्रतिनिधी र नगरपालिकाका कर्मचारीहरुको उपस्थितीमा अन्य सवै वडाअध्यक्षसहित जनप्रतिनिधीहरुलाई अनलाइन प्रविधिबाट जोड्दै नगर सभा सम्पन्न भएको हो ।
“समुन्नत सम्पदा दिगो पुर्वाधार, समृद्ध कनकाई हाम्रो मूल आधार” भन्ने मूल अभियानका साथ आ.व.२०७७/ ०७८ को बजेट नीति तथा कार्यक्रम प्रस्तुत गर्दै नगर उपप्रमुख प्रसाईँले दीर्घकालीन लक्ष्यहरुलाई सम्बोधन गर्ने गरी तत्कालीन योजनाहरुलाई कार्यान्वयनमा ल्याइएको बताएकी छिन् ।
बजेटमा पूर्वाधार विकास, कृषिको आधुनिकीकरण, विशिष्टीकरण तथा व्यवसायीकरण, शिक्षा, स्वास्थ्य, खानेपानी तथा सरसफाई, संस्कृति तथा पर्यटन प्रवद्र्धन, युवा तथा खेलकुद, महिला बालबालिका तथा लक्षित बर्ग, भवन तथा सहरी विकास, उर्जा, विधुत विस्तार जस्ता कार्य योजनालाई प्राथमिक्तामा राखिएको छ । त्यस्तै बिपद व्यवस्थापन तथा वातावरण संरक्षण, फोहोर मैला व्यवस्थापन, नदि नियन्त्रण, सुचना प्रविधि, तथ्याङ्क संकलन, मेयर आवास कार्यक्रम लगायत नगरको समृद्धिसँग जोडिएका विषय बस्तुहरुलाई बजेटले प्राथमिक्तामा राखेको बताईएको छ । यस पटक कनकाई नगरपालिकाको प्राथमिक्ताको सुचीमा गरीव, भूमिहिन तथा अशक्तमैत्री कार्यक्रम, हरित तथा उज्यालो नगर, मजदुरमैत्री सुन्दर नगर निर्माण लगायत सडक आश्रीत मानवमुक्त नगरपालिका घोषणा गर्ने जस्ता कार्ययोजनालाई बजेटमा समेटिएको छ ।
