सुरुङ्गा \ कनकाई नगरपालिका ३ का स्थानीयवासीले सुरुङ्गावाट झापा कुमरखोदसम्म जाने अमरपथ सडक खण्डमा वुधवार विहानैदेखी अवरोध गरेका छन् ।
सुरुङ्गा चौकदेखी दक्षिण नेपालको सिमा लसुना सम्म जोड्ने २४ किलोमिटर अमरपथ सडक आसपासका वासिन्दाले २४सै घण्टा धुलोले असर पारेर आफ्नै घरमा समेत वस्न नसक्ने अवस्था भएकाले सम्वन्धित निकायको ध्यानआकर्षण गर्न सडक अवरोध गर्नु परेको वताएका छन् । पटक पटक कालोपत्रे भएपनि कमसल कालोपत्रे भएकाले ६ महिना नपुग्दै भत्किएर पिचलाई फेरि ग्राभेल गरेपछि धुलोका कारण सडक आसपासमा वस्न नसक्ने अवस्था सृजना भएको स्थानीय वुद्धिजिवी आर एन संग्रौलाले वताएका छन् । सुरुङ्गा, शरणामती, कामाटोली हुँदै झापाको पुरानो सदरमुकाम कुमरखोद झापावजार जाने अमरपथ सडकखण्डको सुरुङ्गा, टप्पु लगायतका स्थानमा सडकमा टायर वालेर सर्वसाधारणले वाटो अवरुद्ध गरेका हुन् ।
धुलोका कारण अमरपथ सडक आसपासका वासिन्दाहरुमा ज्वरो आउँने, टाउँको दुख्ने, रुघाखोकी, निमोनीया जस्ता रोगवाट ग्रसीत हुन थालेपछि सम्वन्धित निकायको ध्यानआकर्षण गर्न स्थानीयवासी आन्दोलीत हुनु परेको वताइएको छ । वन्द निषेधित शान्ती क्षेत्रभित्रका स्थानीयवासी आँफै वाटो अवरोधका लागि सडकमा निस्कनु रहर नभई वाध्यता भएको संग्रौलाले वताएका छन् ।
सडकमा टायर वालेर स्थानीयवासीले आफ्नो विरोधको कार्यक्रमलाई निरन्तरता दिने भन्दै स्थानीय सरकारको विरोधमा नारावाजी समेत गरेका थिए । अमरपथ सडकमा भएको अवरोधका कारण हरेक दिन आवतजात गर्ने विद्यालय तथा क्याम्पसका यातायातका साधन, व्यवसायीदेखी सर्वसाधारण समेतलाई प्रत्यक्ष असर पर्न गएको छ । सडकमा भएको अवरोध खुलाउँन सशस्त्र र जनपथ प्रहरीको टोली परिचालन गरिए पनि अवरोध कायम नै रहेको वताइएको छ ।
