राम निरौला,
कनकाई खबर / झापाको कनकाई नगरपालिकामा पहिलो पटक कोरोना पोजेटिभ देखिएका तीनजना मध्ये दुईजना युवाले कोरोना जितेर घर फर्केका छन् ।
कनकाई नगरपालिकाले स्थापना गरेको कनकाई बहुमुखी क्याम्पसको क्वारेन्टिनमा रहेका ५६ जना मध्ये ३ जनाको रिपोर्ट पोजेटिभ आएपछि उनीहरुलाई विराटनगरको आइसोलेशनमा लगिएको थियो । त्यहाँ बसेको १२ दिनपछि भएको पिसिआर परिक्षणको रिपोर्ट नेगेटिभ आएका कनकाई नगर वडा नं. ५ का १७ वर्षिय युवा साथै सोही वडाको ठेगाना बताउँने अर्का १६ वर्षिय आठराई संग्रान्ती बजार निवासी युवा भाइहरु कोरोना जितेर अस्पतालबाट घर आएका हुन् । कनकाईका अर्का एक ३५ वर्षिय युवाको भने फेरी पनि पोजेटिभ रिपोर्ट आएको बताइएको छ । अब चार दिन पछि फेरी पिसिआर परिक्षण हुने स्रोतले जनाएको छ ।
भारतको कानपुर, गोरखपुर, लखनौं लगायतका स्थानवाट कोरोना संक्रमित ती युवाहरुसँगै एकैसाथ ७० जना नेपाली युवाहरुको टोली झापा गाउँपालिकाको बोर्डर डिगल बैंक नाकावाट नेपाल प्रबेश गरेको थियो । ती मध्ये दुई दिनका बिचमा ५६ जना कनकाई नगरबासीलाई जेठ ९ गतेदेखि सुरुङ्गास्थित कनकाई बहुमुखी क्याम्पसको क्वारेन्टिनमा राखिएको कनकाई नगरपालिकाका स्वास्थ्य प्रमुख ब्रजेश मेहेताले बताएका छन् । त्यही विचमा दुई हप्तापछि पिसिआर परिक्षणको रिपोर्ट नेगेटिभ आएका ३४ जनालाई क्वारेन्टिन स्थलबाट बिदाई गरिएको थियो भने बाँकी २२ जना क्याम्पसको क्वारेन्टिनमा बस्दै आएका थिए ।
सोही अवधिमा २२ जनाको टोलीमा बस्दै आएका मध्ये ३ जनाको कोरोना पिसिआर रिपोर्ट पोजेटिभ आएको थियो भने अन्य १९ जनाको रिपोर्ट नेगेटिभ आएपनि उनीहरुलाई फेरी केही दिनकालागि क्वारेन्टिनमै राखेर पिसिआर परिक्षण गरेपछि रिपोर्ट नेगेटिभ आएसँगै हाल सवैजना बिदा भइसकेको नगरस्तरीय क्वारेन्टिन फोकल पर्सन लक्ष्मी अधिकारीले बताएका छन् । कोरोना भाइरस पोजेटिभ देखिएका तीनैजनालाई बिराटनगरस्थित आइसोलेशनमा लगिएको थियो ।कनकाईमा भर्खरै मात्र दुर्गापुरस्थित दलित सामुदायिक भवनको क्वारेन्टिनमा रहेकी ३१ वर्षिय अर्की एक महिलाको पनि पिसिआर रिपोर्ट पोजेटिभ आएपछि अहिले धरानस्थित आइसोलेशनमा राखिएको छ । योसँगै अब कनकाई नगरका कोरोना संक्रमित दुईजना र उपचारपछि निको भएर घर आएका दुईजना रहेको नगरस्तरीय क्वारेन्टिन फोकल पर्सन अधिकारीले कनकाई खबरलाई जानकारी दिएका छन् ।
