राम निरौला,
कनकाई खबर / झापाको कनकाईमा १५ वटा घर सिल गर्नुका साथै घरमा रातो झण्डा गाडिएको छ । नगर क्षेत्रमा अत्यावश्यक बाहेक सबै सेवा बन्द गरिएको छ ।
पछिल्लो चरणमा कनकाई नगरपालिकाको दुर्गापुरस्थित दलित सामुदायिक भवनमा रहेको क्वारेन्टिनमा बस्दै आएकी ३१ बर्षिय एक महिलाको कोरोना भाइरसको पिसिआर रिपोर्ट पोजेटिभ देखिएसँगै समुदायमा कोरोना संक्रमण फैलिन नदिन सतर्कता अपनाउँदै कनकाई नगर क्षेत्रमा थप कडाई गरिएको हो ।
कुबेतवाट आएकी कनकाई नगरपालिका ७ निवासी ती महिलाको सम्पर्क समुदायमा समेत भएको हुँदा कोरोना भाइरस फैलिने उच्च जोखिमका कारण सम्वन्धित व्यक्तिको घरपरिवारसहित सोही टोलका १५ वटा घरलाई पाँच दिनकालागि सिल गर्दै पहिचानकालागि घरमा रातो झण्डा गाडिएको कनकाई नगरपालिकाका प्रमुख राजेन्द्र पोखरेलले बताएका छन् ।
कनकाई नगरमा यस अघि तीनजनामा कोरोना संक्रमणको पिसिआर रिपोर्ट पोजेटिभ आएको थियो । यसरी चौथो व्यक्तिमा संक्रमित प्रमाणित भएसँगै थप कन्टेक ट्रेसिङ गर्नु पर्ने भएपछि जोखिम नियन्त्रण तथा व्यवस्थापनकालागि सुरक्षा व्यवस्थालाई कडाई गरिएको नगर प्रमुख पोखरेलले जानकारी दिएका छन् ।
नगरस्तरीय कोरोना भाइरस रोकथाम तथा नियन्त्रण समितिको आकस्मीक बैठक बसी संक्रमणको सम्भावित जोखिमवाट बच्न र बचाउँन अत्यावश्यक काम बाहेक आफ्नो घरबाट बाहिर नजान समेत नगर प्रमुख पोखरेलले नगरबासीलाई अपिल गरेका छन् । समितिको बैठकमा भएको निर्णय अनुसार आज असार ८ गते सोमवार दिउँसो १२ बजेदेखि असार १३ गते शनिवार रातको १२ बजेसम्मकालागि कनकाई नगरका वडा नं.१ देखी वडा नं.७ भित्रका सम्पूर्ण बजार/पसल, शैक्षिक संस्था, नगरपालिका कार्यालय, वडा कार्यालयहरु, बैंक तथा बित्तिय संस्थाहरु, सहकारीहरु पूर्ण रुपमा बन्द गर्ने निर्णय भएको बताइएको छ । त्यस्तै ओपिडी बाहेकका स्वास्थ्यका अत्यावश्यक सेवाहरु खुल्ला रहने साथै निर्माण कार्य तथा अत्यावश्यक सेवाकालागि प्रयोग हुने सवारी साधनहरुलाई भने संचालनमा कुनै रोक नलगाउँने निर्णय भएको कनकाई नगरपालिकाले जारी गरेको सुचनामा जनाइएको छ ।
