कनकाई खबर / छैठौं अन्तर्राष्ट्रिय योग दिवसको अवसरमा झापाको कनकाईमा संचालित योग सप्ताह कार्यक्रमको समापन भएको छ ।
पतन्जली योग कनकाई नगर समितिको आयोजना एवम् जिल्ला समिति झापाको समन्वयमा असार १ गतेदेखि सुरुङ्गामा संचालन भएको योग सप्ताह कार्यक्रमको अन्तर्राष्ट्रिय योग दिवसको अवसर पारेर समापन गरिएको हो ।
योगअभ्यासमा अत्यन्तै रुची राख्दै आएका कनकाई नगरपालिकाका प्रमुख राजेन्द्र पोखरेलले समापन समारोहलाई सम्बोधन गर्दै योगअभ्यासले सकारात्मक चिन्तनको विकास गर्दै शरिर र मनलाई जोड्ने भएकाले मानिसको जीवनमा योगअभ्यास अनिवार्य भएको बताएका छन् ।
बोटविरुवामा भएको अत्याधिक विषादीको प्रयोग, अव्यवस्थित खानपान साथै धेरै व्यस्तताका कारण अस्वस्थ बन्दै गएको मानव समुदायलाई स्वस्थ बनाउँनकालागि एक मात्र बिकल्प योगअभ्यास भएकोले कनकाई नगर क्षेत्रमा योगअभ्यासलाई अभियानका रुपमा संचालन गर्न नगर प्रमुख पोखरेलले योग समितिलाई अनुरोध गरेका छन् ।
पछिल्लो समय क्यान्सर साथै कोरोना भाइरस जस्ता विभिन्न किसिमका रोगवाट पिडित बन्दै गएको मानव समुदायकालागि आत्माबल बढाउँनलाई स्वस्थ खानपान र नियमित योगअभ्यासमा ध्यान दिनुपर्ने कुरामा नगर प्रमुख पोखरेलले नगरबासीलाई अनुरोध गरेका छन् ।
पतन्जली योग कनकाई नगर समितिका अध्यक्ष टिकाप्रसाद जमरकट्टेलको सभापतित्वमा सम्पन्न योगअभ्यास कार्यक्रममा जिल्ला समितिका सहमहामन्त्री योग गुरु रुद्र ओलीले जडीबुटीबाट कसरी फाइदा लिन सकिन्छ भन्ने बिषयमा जानकारी गराएका थिए । योग गुरु ओलीले स्वागत तथा पतन्जली योग समिति कनकाईका महामन्त्री राम निरौलाले संचालन गरेको समापन कार्यक्रममा कनकाई ३ का वडाअध्यक्ष रुद्रप्रसाद चिमरीया, जीवन विज्ञानका प्रशिक्षक खेम उप्रेती, समाजसेवी प्रभाखर कडरीया, योग समितिका सल्लाहकार ज्योती उप्रेतीलगायतले कनकाई नगरमा योगअभ्यासलाई निरन्तरता दिनु पर्नेमा जोड दिएका थिए ।
योगअभ्यासलाई निरन्तरता दिनकालागि तत्काललाई योग समितिका नगर अध्यक्ष कट्टेलको निवासमा रहेको हलमा संचालन गर्ने गरी पतन्जली योग साधना केन्द्र सुरुङ्गा स्थापना गरिएको छ । योग समिति कनकाईकी कोषाध्यक्ष गोमा निरौला ढुङ्गेल संयोजक रहने गरी स्थापना गरिएको साधना केन्द्रमा नगर समितिका अध्यक्ष टिकाप्रसाद जमरकट्टेल, युवा योग गुरु प्रतापबाबु जमर कट्टेलले सहजीकरण गर्दै जाने बताइएको छ ।
