राम निरौला,
कनकाई खबर / कोरोनाको कहरसँगै आवश्यक स्वास्थ्य सुरक्षा अपनाउँदै झापा गाउँपालिकाले छैठौं गाउँसभावाट आ.व. २०७७/०७८ को नीति तथा कार्यक्रम सार्वजनिक गरेको छ ।
समृद्ध झापा र सुखी झापाबासी निर्माणको अभियानमा अघि बढेको झापा गाउँपालिकाले आफ्ना जनताको आवश्यक्तालाई मध्यनजर गर्दै छिटो र प्रतिफलयुक्त विकासलाई सम्बोधन गर्न न्युन स्रोतवाट अधिक्तम क्षेत्र समेट्ने गरीको नीति तथा कार्यक्रम सार्वजनिक गरेको जनाइएको छ । गाउँपालिकाका अध्यक्ष जयनारायण शाहको सभापतित्वमा सम्पन्न भएको गाउँ सभामा उपाध्यक्ष कुन्तीदेबी बुढाथोकीले वार्षिक नीति तथा कार्यक्रम प्रस्तुत गरेकी हुन् ।
वार्षिक नीति तथा कार्यक्रम सार्वजनिक गर्दै गाउँपालिका उपाध्यक्ष बुढाथोकीले कार्यन्वयन गर्न नसकिने भद्धा प्रकृतिको विकास निर्माणको योजनालाई निरुत्साहित गर्दै कार्यन्वयन योग्य संक्षिप्त कार्यक्रमको गोजीपात्रोका रुपमा नीति तथा कार्यक्रम सार्वजनिक गरिएको बताएकी छन् । ‘झापा गाउँपालिकाको दृष्टि, कृषि स्वास्थ्य र पूर्वाधार मार्फत समृद्धि’ भन्ने मूल नारामा केन्द्रित रहेर यस वर्षका सम्पूर्ण आर्थिक क्रियाकलापहरु संचालन गरिने गाउँपालिका उपाध्यक्ष बुढाथोकीले जानकारी दिएकी छन् ।
भारतसँग सिमा जोडिएको झापाको दक्षिणी क्षेत्रमा रहेको यस गाउँपालिकाले आफ्नो नीति तथा कार्यक्रममा आर्थिक विकासका लागि कृषि,पशु, बैंक तथा वित्तिय संस्था, पर्यटन,वित्तिय व्यवस्थापनलाई विकास गर्नुपर्ने उल्लेख गरेको छ । नीति तथा कार्यक्रममा सामाजिक र साँस्कृतिक विकास तर्फ शिक्षा, स्वास्थ्य,युवा तथा खेलकुद, खानेपानी तथा सरसफाई, महिला विकास, वालबालिका, ज्येष्ठ नागरिक, आदिबासी ,जनजाती दलित सबन्धी निती, अपाङ्गता सबन्धी नीति ,यौनिक लैंगिक, अल्पसंख्यक, खस आर्य सबन्धी नीति ,संस्कृती प्रवद्र्धन, सामाजिक उत्थान, सामाजिक मेलमिलाप तथा न्याय निरुपण आदि कुरा समाबेश गरिएको छ । गाउँपालिकाले नीति तथा कार्यक्रम मार्फत पुर्वाधार विकास,वन वातावरण तथा विपद व्यवस्थापन, संस्थागत विकास,सेवा प्रवाह सुशासन लगायतका कार्यक्रमलाई समय सापेक्ष र प्रविधिमैत्री बनाउँदै प्राथमिक्ताका साथ अघि बढाउँने किसिमको योजनालाई नीति तथा कार्यक्रममा समावेश गरिएको गाउँपालिकाका प्रमुख प्रशासकीय अधिकृत जीवन निरौलाले कनकाई खबरलाई जानकारी दिएका छन् ।
गाउँपालिकाको तर्फवाट सार्वजनिक गरीएको नीति तथा कार्यक्रममा सहभागी विभिन्न राजनीतिक दलका प्रमुख तथा प्रतिनिधी, स्थानीय क्रियाशिल सामाजिक संघसंस्थाका प्रमुख तथा प्रतिनिधीहरु लगायत सरोकारवालाले उठाएका सवालको गाउँपालिका अध्यक्ष जयनारायण शाह र उपाध्यक्ष कुन्तीदेवी बुढाथोकीले जवाफ दिएका थिए । समारोहमा गाउँकार्यपालिका सदस्यहरु लगायत स्थानीय जनप्रतिनिधी साथै गाउँपालिकाका कर्मचारीहरुको समेत उपस्थिती रहेको जनाइएको छ ।
