कनकाई खबर / झापाको कनकाई नगरपालिकामा पहिलो पटक तीनजनामा कोरोना भाइरस पोजेटिभ देखिएकोे छ ।
कनकाई नगरपालिका क्षेत्रमा रहेका विभिन्न क्वारेन्टिन मध्ये कनकाई बहुमुखी क्याम्पस सुरुङ्गामा रहेको क्वारेन्टिनमा बस्दै आएका तीनजना पुरुषमा कोरोना पुष्टी भएको झापाका महामारी फोकल पर्सन जीवन चम्लगाईले बताएका छन् । कोरोना पोजेटिभ पुष्टी भएका मध्ये कनकाई ३ का ३५ वर्षीय युवा भारतस्थित कानपुरमा लामो समयदेखि होटल व्यवसाय गर्दै आएको बताइएको छ । त्यस्तै युपी भारतको गोलाबाट आएका कनकाई ५ का १७ वर्षीय पुरुष साथै सोही स्थानवाट आएका तेह्रथुमको आठराई गाउँपालिका वडा नं.१ संग्रान्ती बजार घर बताउँने १६ वर्षका पुरुष गरी तीनजनामा पिसिआर रिपोर्ट पोजेटिभ आएको हो ।
भारतको कानपुर, गोरखपुर, लखनौं लगायतका स्थानवाट २० दिन अघि मात्र कोरोना संक्रमित ती युवाहरुसँगै एकैसाथ ७० जना नेपाली युवाहरुको टोली झापा गाउँपालिकाको बोर्डर डिगल बैंक नाकावाट नेपाल प्रबेश गरेको थियो । ती मध्ये दुई दिनका बिचमा ५६ जना कनकाई नगरबासीलाई जेठ ९ गतेदेखि सुरुङ्गास्थित कनकाई बहुमुखी क्याम्पसको क्वारेन्टिनमा राखिएको कनकाई नगरपालिकाका स्वास्थ्य प्रमुख ब्रजेश मेहेताले बताएका छन् । केही दिन अघि पिसिआर परिक्षणको रिपोर्ट नेगेटिभ आएपछि ३४ जनालाई क्वारेन्टिन स्थलबाट बिदाई गरिएको थियो भने बाँकी २२ जना क्याम्पसको क्वारेन्टिनमा बस्दै आएका थिए ।
सोही अवधिमा २२ जनाको टोलीमा बस्दै आएका मध्ये ३ जनाको कोरोना पिसिआर रिपोर्ट पोजेटिभ आएको छ भने अन्य १९ जनाको रिपोर्ट नेगेटिभ आएपनि उनीहरुलाई फेरी केही दिनकालागि क्वारेन्टिनमै राखिएको नगरस्तरीय क्वारेन्टिन फोकल पर्सन लक्ष्मी अधिकारीले बताएका छन् । कोरोना भाइरस पोजेटिभ देखिएका तीनैजनालाई बिराटनगरस्थित आइसोलेशनमा लगिएको बताइएको छ ।
अब झापाका १५ स्थानीय तह मध्ये कोरोना भाइरस संक्रमण फेला नपरेका २ वटा स्थानीय तह विर्तामोड र शिवसताक्षी नगरपालिका मात्र रहेका छन् ।
